“Mayuh bala kitai nyangka enda entu ibuhka hari indai tu tang enti diperatika, mayuh jasa sida indai ngagai kitai ti digelar anak.”

ROBAN: Tanggungpengawa bala indai ukai pengawa ke muntang, ku Kaban Parlimen Saratok Ali Biju.

Iya ke mega Kaban Kunsil Nengeri (Adun) Krian madah tanggungpengawa bala indai chukup besai taja dipeda baka diau di rumah aja.

“Kitai nemu sekeda bala apai jarang nguan rumah laban bejalaika tanggungpengawa sida, lalu bala indai lebih agi begulai enggau bala anak di rumah, besai endar tanggung pengawa sida ngemesaika bala anak.

“Mayuh bala kitai nyangka enda entu ibuhka hari indai tu tang enti diperatika, mayuh jasa sida indai ngagai kitai ti digelar anak,” ku iya.

Iya madah munyi nya rambau bejadika pengerami Makai Lemai beserimbai enggau Hari Indai ti diatur Raban Indai Gerija St Paul Roban ditu, kemari.

IBUN MANAH INDAI KITAI.. Adun Krian Ali Biju (tengah) begulai enggau komiti pengatur pengerami sereta paderi St. Paul Roban, Reverend Philip Mang ba Parish Hall St Paul Roban, kemari.

Nangkan nya, Ali madahka hari indai tu endang patut diintu dikena ngingatka penyiru bala indai ke udah bebendar ngintu diri sebilik.

“Ukai semina ba ruang bilik kitai, tang ba pengawa luar mega, sida indai tu likun agi ngereja pengawa ari sida ke lelaki.

“Lebih agi baka ba pengawa gerija, enti nadai bala indai tu lebuh pengawa gerija, sigi berasai puang tiap pengawa ke dipejalaika kitai,” ku iya.

Berebak enggau nya ku Ali, dikena ngenang pemendar bala indai udah gawaka gerija, sereta mantu ngemansangka gerempung sida tu, dia iya madah meri bantu RM 10,000 ngagai Raban Indai Gerija St. Paul Roban.