“Anak tuai iya nya enda apus besekula ketegal nyaup indai iya ngiga belanja dikena nupi sida sebilik.”

SAMARIANG: Gerempung Pengintu Pengelantang Harapan Kuching (Hope Place Kuching) mantu Katherine Edwin, 48 taun ti ngembuan dua iku anak nyelai pendiau (OKU).

Pemungkal gerempung tu, Kelvin Wan madahka Katherine tu siku indai ti napi pemar pengidup ke chukup besai laban ngintu tiga iku anak iya ke bukai kelimpah ari dua iku ti OKU nya.

“Katherine tu bisi laki, tang laki iya enda manah pendiau ketegal bisi penanggul ba runding ngujungka laki iya nadai teulihka batang pengawa.

“Nya alai, kami ari gerempung tu nulung ngelempung ke penusah iya meri perengka dapur enggau pemakai,” ku iya.

BEKUNSI BEREKAT…Kelvin Wan nyua bantu barang pemakai ngagai sida Katherine sebilik.

Ku Kelvin, tudah Katherine tu semina ngarap ke bantu ari opis pengintu pengelantang enggau bantu ari anak tuai iya ti gawa ba kedai runcit.

“Anak tuai iya nya enda apus besekula ketegal nyaup indai iya ngiga belanja dikena nupi sida sebilik.

“Tambah mega Katherine enda ulih mindah jauh laban ngintu anak iya ti nyelai pendiau ba rumah,” ku Kelvin nusi.

Sida Kathrine tu diau ba rumah PPRT dampih Semariang Baru ungkup orang ti kurang penatai pemisi.

Nyema mensia mayuh bisi ati deka sama enggau Gerempung Pengintu Pengelantang Harapan Kuching mantu orang tusah, tau beri bantu belanja nengah akaun Maybank 5112-8900-1160.

SINU..Gaya bilik peninduk endur bala anak Katherine ti OKU.