“Nengah chara ngena ngepan, tanda… tu meh main asal ti patut dikemegah lalu semua tu patut dipeturun ngagai rebak dudi.”

BETONG: Nembiak rebak baru bansa Dayak patut belajar sereta nyaga main asal ngambika pengerami Gawai Dayak nyadi siti pesaka asal awak enda rarat dilamun arus pemansang.

Sapit Kepala Menteri Datuk Amar Douglas Uggah Embas madah, Program Bejalai Bebala Mayuh Gawai Dayak Renggat Menua Betong ti diatur ninting taun dikena nunjuk ngagai rebak baru ke diatu pasal penyelai main asal ti patut ditegap.

“Kitai deka rebak baru ngelala main asal komuniti Dayak.

“Kitai ngarap rebak tu ulih belajar, nyaaga lalu pebasa ke iya nyadi siti ari pesaka asal menua kitai tu.”

CHAMPION … Sapit Kepala Menteri Datuk Amar Douglas Uggah Embas nyuaka perais champion penuh ngagai kontinjen SMK Saint Augustine ba Program Bejadika Pengawa Bejalai Bebala Mayuh Gawai Dayak Renggat Bagi Menua Betong 2019 di Balai Sukan Tan Sri Datuk Amar Stephen Kalong Ningkan, kemari. Gambar OSMAN RAZALI

“Nengah chara ngena ngepan, tanda… tu meh main asal ti patut dikemegah lalu semua tu patut dipeturun ngagai rebak dudi,” ku iya.

Iya ti nyadi Kaban Kaunsil Nengeri (Adun) Bukit Saban mansutka jaku rambau ngerasmika Pengawa Bejalai Bebala Mayuh Gawai Dayak Renggat Bagi Menua Betong 2019 di Balai Lumba Tan Sri Datuk Amar Stephen Kalong Ningkan, kemari.

Uggah nyikap pengawa ngatur program bejalai bebala mayuh tu nyadi sebengkah aktiviti ti chukup manah dikena mantaika main asal komuniti Dayak sereta semengat penyerakup raban bansa.

“Sehari tu kitai nunjuk ngagai Malaysia senentang main asal bansa Dayak nyadi sebagi ari main asal ti narit ati, bisi ba menua tu.

“Kitai mantaika pemanah enggau penyelai kelimpah aspek mayuh bengkah main asal mega dibantai di Betong, pengawa bejalai bebala mayuh ukai semina disereta komuniti Dayak tang digulu mayuh bengkah raban bansa,” ku iya.

Iya nagih semengat ‘Segulai Sejalai’ ti nyadi rambai jaku pengerami ngambika terus dikemeran awakka pemansang meruan dipejalaika.

JAKU PERANSANG… Datuk Amar Douglas Uggah ngarap program pengerami ti berambaika jaku Segulai Sejalai tu ulih ngangkatka menua Betong ngagai siti renggat ke lebih tinggi jemah.

Ke dulu suba Adun Layar Gerald Rentap Jabu madah, penyerakup entara kaum di Bagi Menua Betong tu nyadi pun penegap.

“Ninting taun kitai meda beribu komuniti begempuru nyereta pengawa bejalai bebala mayuh ukai semina ari sida bansa Dayak tang bisi dipasuk raban bansa Melayu, China serta pupu raban bansa ke bukai.

“Aku arap ulih ngangkatka menua Betong ngagai siti renggat ke lebih tinggi jemah ila nengah penegap tu,” ku iya.

Pengawa bejalai bebala mayuh tu dipegai Sekula Sekondari (SMK) Saint Augustine dipadu nyadi champion penuh lalu mai pulai perais duit RM13,000 sereta trofi begintir, trofi champion enggau setipikit.

Bisi datai rambau program nya Kaban Parlimen Betong Datuk Robert Lawson Chuat, Residen Bagi Menua Betong ti nyadi Penyanding Penemu Komiti Induk Pengerami Friday Belik, Direktor Kolej Vokasional Betong ti nyadi Chairman Komiti Induk Pengerami Lim Ah Juan, Injinir Unit Opis Kereja Raya (JKR) Bagi Menua Betong ti nyadi Chairman Komiti Pengawa Bejalai Bebala Mayuh Chiresly Francis Kureng enggau Pemesai Pelilih Betong Sofhi Jebal sereta urung 1,500 iku peranak ti ngelingi menua nya.

(gambar hiasan)