TAMIN: Mayuh bengkah pemansang udah mujur dipejalaika pengudah setaun Komiti Pemansang Menua (ADC) Batang Oya ditumbuh.

Chairman ADC, Henry Kanyan madah rayat ba pelilih Batang Oya sedar enggau tuju, visyen sereta misyen komiti tu.

“Tu nunjukka rayat sedar guna sida ke bempu tauka nyadi tuan tanah nyaga hak enggau tanah sida.

“Entara projek pemadu besai dipejalaika komiti tu iya nya nyukat ngena juruukur kediri ngambika ulih nentuka bagi menua enggau sempadan tanah diri empu,” ku iya.

Iya madah munyi nya rambau Aum Besai Ninting Taun ti Keterubah Komiti ADC Batang Oya ti dipenyadika Pemesai Pelilih Menua Selangau, Henry Inting di Rumah Jackson Ngumbang, Rantau Dangih, Pakoh.

KEK PENGERAMI.. Chairman Komiti ADC Batang Oya, Henry Kanyan (tengah) sereta bala bukai begulai nyirap kek kelai bejadika Aum Besai Ninting Taun ti Keterubah Komiti ADC di Rumah Jackson Ngumbang, Rantau Dangih, Pakoh ditu, apin lama.

Nangkanka nya, ku Henry, pelilih Batang Oya udah dikemendarka Perintah Sarawak nengah Seksyen 18 kanun tanah nengeri Sarawak bagi pelilih menua Batang Oya, Pakoh enggau Sekuau ngambika disukat.

“Komiti tu bisi tanggungpengawa ti besai ngiga jalai mutarka penanggul berebut tanah entara sida ke bempu tanah enti juru ukur tanah nya udah disedia.

“Dalam timpuh setaun tu, entara penyulut ke udah dijapai kami iya nya ngagai jalai alun ba genturung pendiau lalu tu kerejasama begulai enggau Adun Tamin, ADC Batang Oya, enggau Serikat Mutiara Alam Jati,” ku iya.

Rambau aum nya, Henry nyerahka 554 iti peta tanah tauka 3,250 hektar tanah ke udah disukat ngagai raban ADC.

Naka ke diatu, ADC Batang Oya nerima mayuh pinta ari komuniti di Batang Oya, Pakoh enggau Sekuau lalu urung 635 iku sida ke ngembuan tanah ti baru deka masuk enggau komiti tu.

Pinta sida tu deka diperundingka pengudah direktor tiap pelilih menua nya ngaga aum baru.