KUCHING: Mayuh agi papan tanda ‘warning’ enggau ‘speed breaker’ patut dipasang di Dun Bukit Semuja.

Palan ke diperambu patut diengkah papan tanda tu iya nya sitak Air Manis Stabun, Kampung Kakai, simpang Kampung Tangga Mawang, Jalai Baki Riih di Kampung Riih Daso enggau Kampung Labak Tungan, Jalai Gedong di Kampung Triboh, Kampung Remun, Kampung Lebor enggau Kampung Kuala.

Adun Bukit Simuja John Ilus madah, kebuah minta dipasang papan tanda nya laban bala penguna suah lelaju deriba maya mansa kandang menua nya.

“Bisi sekeda jalai ba sitak Bukit Semuja patut diperunding ngagai tikas pengelikun lenih agi bala penguna.

“Kebuah penusah bebadi ke sama nyadi berinik ari ulah sesiku orang, kereja tauka ngemanahka jalai entara kebuah ngujungka siku indu ke benung kemisi lalu pulai ke menua kena lantang sebuah kerita ke dipasang laju ngujungka indu nya bebadi nyawa taja palan nya ba kandang genturung pendiau,” ku iya.

JOHN ILUS

Iya madah munyi nya rambau bejuraika Mosyen Meri Basa Ngagai Jaku TYT Sarawak, kemari.

Nerang silik, piak sida mega bisi minta bantu ‘zebra crossing’ digaga ba simpang Kampung Tangga Mawang ke pemaik pengelikun nembiak sekula.

Ngelansa pekara bukai, John mega minta Perintah Sarawak nyukat tanah ke bedau disukat enggau lengkas sereta Surat Pala Tanah.

“Sitak Dun Bukit Semuja berimbai enggau mengeri Serian sereta
pemansang majak nyadi ba kandang menua nya.

“Nya alai beduduk ari nya, kitai minta ngambika atur ke patut digaga piak ke bekaul,” ku iya.

Ngelansa pasal bantu pengerai, piak sida ngarap Palan Dialisis Mawar Serian enda ditutup dikena mantu pesakit tungkul sengayuh berubat.

“Lebih 50 pesakit tungkul sengayuh udah ngerejister diri lalu sida udah nulis surat enggau minta ngambika palan nya enda ditutup.

“Taja palan nya agi dibuka jam diatu, tang dudi hari nasip iya empai temu nganti pemutus piak ke mangku pengawa,” ku iya.