KUCHING: Perintah Sarawak enda patut beragih ba perambu Pemansang Transformasyen Menua Pesisir (RTP), ku Adun Krian Ali Biju.

Kenu ku Ali, Perintah Sarawak bechiping sereta beragih maya ngatur pemansang RTP ngagai genap rayat di menua tu.

“Sekeda rayat menua pesisir endang sengaja dikelaung ari ngasaika pemansang semina ketegal polisi Perintah Sarawak enda ngungkupka belanja dikena ngemansangka sitak Dun ke dipegai pengari Pakatan Harapan (PH).

“Polisi ti nyiping rayat Perintah Sarwak tu besibil amat enggau juluk TYT kitai sereta enda nipakka prinsip demokrasyen,” ku iya madah nyemetak.

Ali mansutka jaku nya lebuh mantaika jurai basa nimbal jaku TYT Sarawak Tun Abdul Taib Mahmud rambau Pengawa Bejadika Aum Dun Ke-18 Renggat Keempat ditu, kemari.

NEMUAI BASA… Bala kaban PKR Sri Aman diuluka Ketuai Pampang Yen Jebeni (dua kiba) nemuai meri basa ngagai Ali Biju (tiga kiba) di opis iya di Begunan Dun Baru nyerumba aum Dun tu tadi.

Nangkan nya ku iya, projek RTP enggau agih belanja ti besai (RM 2 bilion) patut dibagi bela ngagai genap rayat Sarawak laban nya hak sida.

“Perintah Sarawak patut ngagihka belanja ngagai genap Adun enggau enda ngira penemu politik sida.

“Nitihka bajet Sarawak dalam Langgur Pemansang Malaysia Lumpar Ke-11 (RMK11), sepenyampau RM333 juta udah diagih dikena bejalaika projek nangkir genturung pendiau.

“Di Saratok, 152 iti lot udah disedia di Kampung Melango enggau Kampung Hulu lalu penyampau agih belanja tu enda tetangkupka peminta ti kelalu mayuh.

“Nya kebuah aku minta agih belanja dikena nangkir genturung pendiau tu ditambah ngambika nembiak rebak baru bela ampit lot rumah ila,” ku iya.

Kelimpah ari nya, Ali mega bisi minta agih belanja dikena nangkir rumah panjai baka nyungkur taba berumah.