Diatu Engkilili semina ditelah sebuah Pelilih Mit di baruh kuasa Opis Kuansil Pelillih Lubok Antu

“Nengah pemisi bemacham perengkaguna sereta projek pemansang ke benung dipejalai ba Dun Engkilili, nyadi engkeman amat endur Engkilili diangkat nyadi sebuah agi Pelilih Menua dalam pegai Bagi Menua Sri Aman.”

KUCHING: Sitak Engkilili patut diangkat nyadi sebuah Pelilih Menua, ku Kaban Kunsil Nengeri (Adun Engkilili-PSB) Dr Johnical Rayong Ngipa.

Ku iya, diatu Engkilili semina ditelah sebuah Pelilih Mit di baruh kuasa Opis Kuansil Pelillih Lubok Antu.

“Nengah pemisi bemacham perengkaguna sereta projek pemansang ke benung dipejalai ba Dun Engkilili, nyadi engkeman amat endur Engkilili diangkat nyadi sebuah agi Pelilih Menua dalam pegai Bagi Menua Sri Aman.

“Perambu tu kala dikenatai maya aum sebedau tu laban iya tau dikumbai ‘pemeri’ ari Perintah Nengeri ke chukup lama dianti semua peranak Engkilili lalu ngarapka iya ulih diperunding sereta dikemendar,” ku iya.

Iya madah munyi nya rambau bejuraika mosyen Meri Basa Ngagai Jaku TYT rambau bejadika Aum Dun Ke-18, kemari.

Dr Johnical Rayong Ngipa

Berebak enggau nya, Dr Rayong mega ngenataika peminta rayat ti minta Palan ‘Service Centre’ Perintah digaga di Skim Skrang.

“Beduduk ari menua Skim Skrang bepalan ba endur ke strategik, nya alai engkeman amat palan Service Centre dibuka ba endur tu. Tambah mega, ditu udah bisi perengka guna pemun baka klinik, balai polis, librari enggau mayuh agi ke bukai.

“Skim Skrang seruran ditapatka mensia mayuh ke datai ari menua bukai,” ku iya.

Kelimpah nya, Dr Rayong minta perintah ngelengkaska pengawa ngaga tiang telekomunikasyen dikena ngemanah agi servis arus penyambung di sitak Engkilli.

“Enti udah bisi tiang telekomunikasyen tu dia rayat ulih ngasaika perengkaguna ‘Jalur Lebar’ sereta nyapai juluk perintah bekaul enggau pemansang ba bidang Digital Ekonomi.

“Entara sitak ke patut endur nirika tiang telekomunikasyen tu iya nya menua dibungkur Batang Ai Engkilili rembus ke Skrang Ili, Ulu Skrang, Panchor, Entalau enggau Sungai Paya,” ku iya.