LUBOK ANTU: Lumba enggau main engkeman nyadika menalan dikena nerenak ulah bebasa sereta nyintal kaul entara pangan diri.

Pemesai Khas MP Lubok Antu Jugah Muyang, Robert Lingga madah, pekara tu tau tebantai ari sesebengkah pekit ke diatur.

“Kitai di Pelilih Lubok Antu deka meda mensia mayuh lebih agi nembiak regas ba lumba enggau main laban tu pelasar ti chukup engkeman endur kaul kitai semak enggau pangan diri.

“Pia mega, kitai ulih ngembing bala nembiak nuju kuing pengidup ti meruan agi sereta nyeliahka sida ari ngereja ulah enda menuku,” ku iya.

Iya mansutka jaku tu lebuh ngarika Jugah bejadika Pekit Sepak Takraw Parlimen P. 203 Lubok Antu Trofi Jugah Muyang ke diatur di Gelanggang Sepak Takraw SMK Lubok Antu, ensanus.

PENGINGAT… Robert (tengah) nerima tepa ari komiti pengatur lebuh ngarika Jugah bejadika Pekit Sepak Takraw Parlimen P. 203 Lubok Antu Trofi Jugah Muyang, ensanus.

Ku Robert, pekit ke diatur nya ditibak ari penemu Jugah empu ti deka ngemai enggat ngangkatka bala nembiak di Lubok Antu ngagai tikas tinggi agi ba pengawa lumba enggau main.

“Ari pengawa tu kitai ulih nyidi penau enggau ngansah pengelandik bala penyereta sebedau dibai ngagai tikas ngankan nya.

“Tu deka nyadi pelasar ngemai atlit bepengelandik ba main tu ngambika sida landik agi,” ku iya lebuh ngelansa pasal tuju pekit nya diatur.

Berindik ari nya, Robert ngarapka mayuh agi bansa main sereta pekit deka diatur nangkan tu kelimpah ngandal deka nerima timbale ke manah ari mensia mayuh.

“Pengawa ngatur pekit tu meransang enggau nyedia peluang ngagai mensia mayuh berandau, begulai sereta bekerejasama enggau pangan diri.

“Lalu program baka tu mega tau ngemai kitai diau besemak agi enggau pengari rayat ditu,” ku iya madah nyemetak.

Pekit belabuh 4 nyentuk 5 Mei 2019 tu diatur Raban Nembiak Nanga Sumpa enggau 24 tim udah bepekit ngerebut gelar champion.

Tim SRT menggi gelar champion lalu sida pulai ngemai perais mata duit penyampau RM500, midul enggau trofi.

Penuduk lumur dua enggau tiga dipenggi Tim R.P.R.A enggau tim YahWeh nerima perais RM300 enggau RM250 disempulang midul enggau trofi.

Seraya perais sagu ati RM100 pulai ngagai tim The Panthe.