KUCHING: Genturung pendiau di Simujan agi tubah apin nerima bekal kuasa karan sereta agi bepanggai ba injin api, ku Adun Simunjan, Awla Dris.

Ku Idris, peranak menua nya mega sebana ditating rega makit minyak ti enda tentu sereta mayuh belanja tebasau.

“Sekeda genturung pendiau apin nerima bekal kuasa karan taja udah bisi grid besai.

“Jematan Gedong enggau Jematan Simunjan mega begunaka lampu jalai sereta nyadi jalai alternatif ngelawa menua besemak baka Samarahan, Serian enggau Kuching,” ku iya.

Awla mansutka jaku nya lebuh mantaika jurai basa nimbal jaku TYT Sarawak Tun Abdul Taib lebuh Pengawa Bejadika Aum Dun Ke-18 Renggat Keempat ditu, kemari.

Alwa Dris

Genturung pendiau dipegai sitak Simunjan nya mega begunaka sambung jalai ti meruan agi ngambika peranak dia lantang mindah ngelawa jalai besai, ku iya nampung.

“Mayuh entukar sida ke diau dia dipaking sebelah tisi jalai lalu pekara tu tau amat ngeruga pengelikun sereta penyalah rama bukai baka enchuri.

“Jalai besai ditu mega suah ampuh bah maya pasang raya lalu aku minta Opis Kereja Raya (JKR) nyeleti jalai tu tinggi agi nentuka penanggul teputar,” ku iya.

Ba lansa bukai, iya ngarapka Perintah Sarawak meri bantu mutarka penanggul nya laban naka diatu apin bisi pengawa udah dipejalai ba peminta projek ti udah dibantaika iya.

Iya mega minta peneras servis internet di sitak Simunjan dikemanah sereta ngentak mayuh agi tiang pemanchar laban agi tubah genturung pendiau dia apin nerima sambung internet ti meruan.

Tu nyengkaum opis perintah baka Opis Pelilih Mit Simunjan, Opis Kaunsil Simunjan, Sepital Simunjan, Opis Pelajar Pelilih Simunjan, SMK Simunjan No. 1, SK Gunung Ngeli sereta ke bukai, ku Awla.