Raban pemerindang diperansang nyaup ngangkatka Belikan ngambi tau tebilang baka Sape

“Arapka bala pemerindang nyaup ngangkatka main asal Belikan ba industri muzik baka ke udah digaga Jerry Kamit dalam ngangkatka Sape nyentuk ke renggat entarabansa.”

KUCHING: Raban pemerindang lebih agi pemuzik Dayak diperansang nyaup ngangkatka main asal Belikan awakka enda tengelam baka ke udah.

Menteri Muda Nembiak enggau Lumba Datuk Snowdan Lawan madah kitai bansa (Iban) patut segulai sejalai, beserakup ngetanka main asal tu laban nya kelai identiti bansa kitai.

“Arapka bala pemerindang nyaup ngangkatka main asal Belikan ba industri muzik baka ke udah digaga Jerry Kamit dalam ngangkatka Sape nyentuk ke renggat entarabansa.”

“Kenyau ari taun 2014 aku endang nyukung pengawa ASADIA dalam ngangkatka main asal kitai Iban.

PENGINGAT…Datuk Snowdan Lawan begambar kenang enggau bala penerima setipikit tamat kelas main asal diatur ASADIA.

“Nya alai, dikena ngemunka pengawa ASADIA dia bantu RM5000 diberi ngagai gerempung tu,” ku iya seraya meri puji ngagai ASADIA ke udah mujur ngidupka baru main asal Belikan.

Iya ke mega Adun Balai Ringin madah munyi nya rambau Pengawa Beserumpu Tamat Kelas Main Asal enggau Bejadika Pengawa Ngangkatka Main Asal Belikan ke diatur ASADIA ba Christian Ecunemical Worship Center di Jalai Stampin ditu, kilah ensana.

Ba pengerami nya, Sowdan bisi ngungkupka belanja RM10,000 dikena ASADIA terus ngangkatka main asal.

Iya mega bisi diberi basa mandangka pengelandik nebah Belikan ba mua mayuh sepengudah 61 taun Belikan bisi ditemu ayan ba dokumentari Tom Harrison 1958.

Urung 700 iku temuai bisi datai ngulu pengerami tu seraya ngemataka pengawa mandangka main asal baka betabuh, kuntau, nebah Sape, Belikan, Birejang Beuh, ajat orang Ulu indu’Kajen Doh’,
ajat indu Iban, marik empang enggau kain burie Basong Taah.

Sama bisi datai bini Snowdan Datin Melinda Claudia Bucking Lawan, Presiden SADIA Sidi Munan, Ketuai ASADIA Mabong Unggang sereta bala bukai.

MANAH…Raban ke udah tamat kelas mandangka pengelandik nebah Belikan ba mua mayuh.