Loji tu ila deka digaga ba Balingian enggau Tanjung Kidurong

KUCHING: Sarawak diatu bisi 4,600 megawatts (MW) karan lalu dikena nambah ke kuasa karan tu perintah bisi merambu nambah dua unit loji kuasa karan ke baru.

Menteri Utiliti, Datuk Sri Dr. Stephen Rundi Utom madah, dua unit loji kuasa karan ti baru iya nya Loji Batu Arang, Balingian 312MW deka tembu ba suku kedua enggau ketiga taun tu.

“Loji kuasa karan ti kedua iya nya Loji Gis Tanjong Kidurong, 842MW dipelaba tembu ba taun 2021.

“Nyadi, penyampau kuasa karan pengudah dua iti loji tu tembu ila iya nya 1,154MW ti dikena nambah ke kuasa karan ti udah bisi,” ku iya.

Iya madahka pekara tu lebuh nyimpul mosyen ba Aum Renggat Keempat Dun ke-18 ditu, kemari.

NYIMPUL MOSYEN…Menteri Utiliti, Datuk Sri Dr. Stephen Rundi Utom benung nyimpul mosyen ba Aum Renggat Keempat Dun ke-18 ditu, kemari.

“Ba sistem penyambung karan, 500kV bekal karan udah dianjung ari Similajau ngagai Lachau kenyau 2017 menya.

“Sistem penyambung projek bekal karan ari Lachau ngagai Tondong agi benung digaga lalu nyema peyambung karan tu ila tembu, Similajau ngagai Tondong nyadi tulang belakang nganjung bekal karan ari tengah Sarawak ngagai selatan Sarawak,” ku iya.

Iya nambahka, dikena ngerembaika bekal karan bisi tiga bengkah projek benung digaga iya nya keterubah ngaga 33kV substesyen projek Serudit ti dijangka tembu ba suku keterubah 2020 ti meri bekal karan ngagai Betong, Pusa enggau Saratok.

“Projek Kedua ngaga 33kV substesyen projek Kapit, dijangka tembu ba suku keempat taun 2020 ti meri bekal karan selampur menua Kapit.

“Lalu ti kepenudi, projek ketiga ngaga 33kV substasyen Niah, dijangka tembu ba taun 2020 ti deka neguhka kapasiti enggau pengelikun sistem karan ba Niah,” ku iya.

Nangkan ke nya, ba Agenda Pelin Utara 275kV Bunut substesyen agi benung digaga lalu dijangka tembu ba taun 2021 nuju Similajau, Miri, Limbang enggau Lawas.

“Kena ngemansangka operasyen pengelengkas enggau nyaga peminta mensia mayuh Sarawak Energy Berhad (SEB) ngepunka informasyen teknologi enggau operasyen bekal karan digital kena ngemansangka servis.

“SEB bepun masang 1,600 meter pintar ba Kampung Gita, Kuching ba minggu tu lalu deka ngaga ba Tabuan Jaya Baru, Tabuan Laru enggau Jalai Kempas diperambu bepun bulan Julai lalu projek tu nagit 6,000 meter pintar dipasang ba pengujung taun tu,” ku iya.