SARATOK: Lumba ulih nanggam teguh agi kaul enggau nerenak disiplin entara bala komuniti, ku Kaban Parlimen (MP) Saratok Ali Biju.

Ku iya, lumba tu mega ulih ngelimpangka bala komuniti kelebih agi raban nembiak ari ngereja ulah enggau pengawa enda menuku ti tau ngerusak pengidup sida dudi hari.

“Bala komuniti patut regas ngaul diri ba pengawa lumba enggau main dikena ngisi awak lepa ari pengawa maya lemai hari.

“Reti iya, jam sida enda deka tebasau ngapa tang diisi ngena aktiviti ti ngemai pemaik ukai semina ngagai pengerai batang tubuh aja, tang mega ari sukut tanggam kaul sida begulai enggau pangan diri,” ku Ali madah nyemetak.

Ali mansutka penemu tu lebuh dirandau Suara Sarawak pengudah bejadika Pekit Main Bol Mangkuk Hari Pengajar Renggat Pelilih Saratok 2019 di Kompleks Lumba Saratok ditu, Hari Enam tu tadi.

CHAMPION… Ali (bediri tengah) begambar ungkup kenang enggau bala pemain Tim GUBAN FC ari Roban pengudah pengawa nyuaka mangkuk enggau midul Pekit Main Bol Mangkuk Hari Pengajar Renggat Pelilih Saratok 2019. – Gambar Uban Dana.

Iya ke mega Adun Krian madahka pengawa lumba enggau main tu mega ngasi amat dikena kitai nanggam kaul begulai bebaik sereta mereti enggau bebasaka pangan diri.

“Kebuah aku nyebut baka tu, mayuh udah nyata dipeda sida ti regas bemain baka main bol deka ngembuan disiplin tinggi, ngasika jaku enggau ajar sereta ulah ti mereti, bebasaka orang bukai.

“Pia mega sida ti bisi pengangkun deka nyapai pemujur ba semua pengawa dikereja. Ambika chunto baka pemain bol tim Sarawak Joseph Kalang Tie, jaguh pechut kitai Watson Nyambek, atlit terejun Pandelela Rinong enggau atlit nyemerai Daniel Bego sereta mayuh sida ke bukai,” ku Ali nerang silik.

Sama bisi datai Ketuai Opis Pelajar Pelilih Saratok Anis Madeli enggau raban ari Opis Pelajar empu sereta bala bukai.

Ngelansa pasal pekit renggat kepenudi nya, Tim GUBAN FC ari Roban menggi gelar champion ngalahka Tim Medical FC enggau gol penyampau 4-2 nengah penalti pengudah kededua tim seri.

Berebak enggau nya, Ali mega bisi ngemendarka agih belanja penyampau RM5000 ngagai gerempung pengajar di pelilih Saratok dikena sida ngatur enggau ngemujurka pengawa lumba ti udah diperambu.

NGUJI BARU… Ali disempulang bala pemain Tim Medical FC begambar ungkup kenang seraya netapka juluk ati deka ngerampas gelar champion ba taun baru. – Gambar Uban Dana.