KUCHING: Perintah Sarawak udah ngungkupka agih belanja penyampau RM1,293 juta dikena ngaga jalai alun ba pelilih menua pesisir, Ku Sapit Kepala Menteri Tan Sri Datuk Amar Dr. James Jemut Masing.

Iya ke mega Menteri Pemansang Infrastruktur enggau Perengka Pengangkut mansutka pekara tu rambau nyimpul mosyen ba Aum Renggat Keempat Dun ke-18 ditu, kemari.

“Pengawa ngaga jalai ngagai pelilih menua pesisir benung digaga diatu lalu perintah menua sigi komited nyendiaka ungkus belanja ti engkeman enggau tembu nitih ke perambu dikena pemansang ekonomi rayat.

“Ba baruh Langgur Pemansang Malaysia Lumpar Ke-11 (RMK11), Perintah Sarawak nyendiaka agih belanja ti chukup kena projek tu.

Ku iya, kediatu pemansang jalai ba pelilih menua pesisir benung digaga ba Jalai Pasi ngagai Jalai Sarikei, Tanjung Manis enggau Jematan Batang Rajang ti mungkur belanja RM321 juta ti dijangka tembu ba 2023 udah dipenyadi Kepala Menteri Sarawak kena 6 April tu tadi.

PROJEK JALAI….Tan Sri Dr. James Jemut Masing benung mantaika mosyen ari Opis Menteri Pemansang Infrastruktur enggau Perengka Pengangkut ba Aum Dun Ke-18 kemari.

Pia mega, iya nambah ngaga jalai ba Jematan Sungai Krian dijangka tembu ba taun 2022 mungkur belanja RM75 juta, Jematan Batang Paloh dijangka tembu ba taun 2023 mungkur belanja RM299 juta enggau Jematan Nanga Lassa dijangka tembu ba taun 2023 mungkur belanja RM598 juta lalu kesemua projek tu udah nelan belanja RM1,293 juta.

“Pengawa ngaga jalai ke bukai ba pelilih menua pesisir baka Jematan Batang Saribas udah ngeluarka tinda kena 7 Januari ngagai 11 Februari taun enggau Jematan Batang Rambungan ti patut dipejalaika baruh Perintah Besai tang diatu ditanggung Perintah Sarawak mega udah ngeluarka tinda kena 13 April nyentuk 8 Mei taun tu.

“Kena nyeruri jalai pelilih menua pesisir dua bengkah pakej udah digaga iya nya pakej A nyengkaum 13 sub pakej dikumbai A1 ngagai A13 enggau pakej B nyengkaum 10 sub pakes dikumbai B1 ngagai B10,” ku iya.

James Masing nerangka, sub pakej A4 ba Kampung Sungai Buluh enggau Sebuyau udah ngeluarka tinda kena 13 April ngagai 8 Mei taun tu, seraya 12 sub pakej ke bukai agi dalam proses ngaga dokumen.

Pia mega, iya nyambung pakej B1 nyengkaum 12.3km ari Sungai Nyalau enggau pelilih Bakam tinda udah dikeluarka kena 27 April nyentuk 22 Mei tu ila lalu semilan sub pakej ke bukai agi dalam pansik enggau ngelangkar.

“Ba projek Jematan Batang Igan ti patut dipejalaika Perintah Besai diatu udah ditanggung Perintah Sarawak agi dalam proses ngelangkar lalu tinda deka dikeluar ba suku ketiga taun tu.

“Lalu projek Jematan Batang Lupar ti suba dibagi setengah enggau Perintah Besai udah ditanggung penuh Perintah Sarawak mega agi ba proses ngelangkar lalu tinda deka dikeluarka ba suku keempat taun tu,” ku iya.