KUCHING: Agih belanja penyampau RM2.8 bilion ungkup renggat keterubah Program Grid Bekal Ai Sarawak ngagai kandang menua dituntung penusah benung dipejalai lalu disadang tembu ujung taun 2020.

Menteri Utiliti Datuk Sri Dr Stephen Rundi Utom madahka bungkur projek rayat tu mungkur palan meresi ai, paip ai, palan nakung ai enggau stesyen ngepam ai ti begunaka pemutar ti meruan nentuka penanggul ai teputar.

“Projek rayat tu mungkur 324 projek ti dilanggur ba Langgur Pemansang Malaysia Lumpar Ke-11 (RMK11) lalu 49 projek udah tembu enggau dikemendar seraya 124 benung digaga. Kesemua ungkus 191 projek nyauka manggai RM2 bilion,” ku iya madah nyemetak.

Rundi mansutka jaku tu lebuh nyimpul mosyen rambau Aum Renggat Keempat Dun ke-18 ditu, kemari.

Pengudah projek tembu, kandang menua napi penanggul bekal ai tejanggal enggau kandang menua ulu deka disambung bekal ai beresi.

SIMPUL MOSYEN… Rundi nunjukka dokumen jaku simpul mosyen Opis Menteri Utiliti ngagai Rayong (kiba) enggau Liwan (kanan) di Dun Kuching, kemari.

“Penanggul bekal ai suah tejanggal ketegal pengawa ngaga jalai alun enggau ngerawang parit ngujungka batang paip pechah.

“Tambah mega bisi sekeda raban nadai tanggungpengawa sengaja ngerusak perengka guna pemun tu,” ku iya.

Pia mega ku Rundi, ketegal bisi penekul ba makit ke alai sekeda projek nyangka deka tembu datai ba suku keterubah 2021. Sekeda projek dipejalai ba menua mayuh pemar mega deka laun tembu.

Bala perunding udah dichiri dalam bulan Mei taun nyin tadi bejalaika pansik pelin besai bekal ai enggau pansik grid ai nentuka Sarawak bisi sistem bekal ai ti meruan.

“Pansik tu dipejalai dikena ngelangkar strategi, nangkup peminta ai dudi hari ungkup timpuh pandak, jelan pengelama enggau timpuh panjai.

“Strategi tu deka mungkur pekara ti diperambu nyengkaum grid ai nengeri, mutarka penanggul bekal ai alternatif ungkup kandang menua ulu,” ku iya nerang silik.

Opis menteri nengah Opis Bekal Ai Menua Pesisir (JBALB) ngiga jalai mutarka penanggul nadai ai ke nyadi isu besai di genturung pendiau Sungai Asap, Asajaya, Tanjung Kelaso, Sadong Jaya, Kampung Taee, Siburan, Tapah, Beratok enggau Pusa lalu pengawa tu dipelaba tembu bulan Jun tu.

Ba pekara kualiti ai beresi di Bau, Lundu, Sematan, Siniawan, Tapah enggau Luchok udah nyapai Standard Kualiti Ai Irup Bansa (NDWQS) lalu pekara tu deka chakah agi dipejalai,” ku iya.

“Bisi 28 projek udah dikemendarka Opis Menteri Pemansang Menua Pesisir (KPLB) ba Langkar Pelin Keterubah (RP1) enggau RP2 dalam taun 2016 enggau 2017.

“Taja pia, semina tiga bengkah projek aja tembu lalu 25 projek agi tejanggal ba mayuh bengkah renggat,” ku iya.

Nambah ke nya, iya ngarapka 11 bengkah projek agi dikemendar KPLB ba RP3 enggau RP4 ti meri pemaik ngagai rayat.

Kelimpah ari nya, opis menteri mega udah bejalaika Skim Bekal Ai Alternatif Sarawak (Sawas) meri bekal ai beresi ngagai komuniti menua pesisir di Sarawak ti nadai disambung bekal ai beresi.

“Skim tu dipungkal di Ulu Pandan, Long Seridan, Long Peluan, Kalampun, Lubok Antu, Kampung Belantak, Nanga Semah enggau Kampung Penasu, Muara Lebaan lalu udah tembu sereta meri pemaik ngagai 572 isi bilik iya nya 2,860 iku peranak,” ku iya madah silik.

Ba renggat nangkan tu, Sawas deka bejalaika 56 projek beungkus RM135 juta ngelawa genturung pendiau mit di menua pesisir sereta disadang tembu datai ba taun 2025.