KUCHING: Agih bantu sepenyampau RM81.58 juta udah dikemendar Perintah Sarawak taun tu ungkup piak kaunsil kandang menua (PBT) dikena ngemujurka 303 projek infastruktur.

Menteri Kaunsil Kandang Menua Datuk Prof. Dr. Sim Kui Hian madah, bantu ti dikemendar tu nyengkaum ungkup Majlis Bandaraya Kuching Selatan (MBKS).

Projek tu nyengkaum ngaga lampu jalai, lampu trafik, jalai orang bedarat, agu mensia mayuh, librari, pengkalan enggau taman rekreasyen.

Ke diatu 17 projek udah tembu enggau 97 projek agi ba mayuh bengkah renggat dipejalaika sereta 189 projek agi pra-kunterik.

Kui Hian nambah, penyampau RM657.13 juta dikemendar dikena ngaga 88 Projek Rayat ti digaga Opis Parit enggau Entali Ai (DID), Kaunsil Pemansang Pengawa Berumah (HDC), Opis Kereja Raya (JKR) enggau piak penerit adat lalu 12 ari 88 projek udah tembu.

UNGKUP RAYAT…Datuk Prof. Dr. Sim Kui Hian (kanan) enggau Menteri Muda Kaunsil Kandang Menua Datuk Dr Penguang Manggil bela beratika isi simpul mosyen Opis Menteri Kaunsil Kandang Menua di Dun, kemari.pix: RAMIDI

Ba baruh Projek Mit Pemansang Menua Pesisir (RTP), ku iya, 564 projek berega RM83.15 juta udah dikemendarka ungkup taun tu.

“Ba baruh Komiti Kabinet ungkup Trasformasyen Menua Pesisir, opis Menteri aku udah nerima RM13.1 juta taun tu ungkup 11 projek tebatan banjir.

“Naka tu, siti projek udah tembu, tujuh projek diperambu tembu taun tu lalu tiga projek agi diperambu tembu ba taun 2020,” ku iya rambau nyimpulka mosyen Opis Menteri Kaunsil Kandang Menua di Dun, kemari.

Kui Hian mega madah, ba baruh Sistem Infomasyen Rikod Jalai Alun Malaysia (Marris) sepenyampau RM322.6 juta udah dikemendar ungkup ba baruh tanggungpengawa 24 piak bekuasa pelilih menua.

“Nyentuk 31 Mac tu tadi, sepenyampau RM141.3 juta udah dikeluarka Sekretari Pekara Wang Nengeri lalu RM24.8 juta udah dikena,” ku iya.

Opis Menteri Kaunsil Kandang Menua (KPKT) mega meri bantu RM30.34 juta ungkup semua 26 PBT di Sarawak ngambi bejalaika 106 projek infrastruktur mit.