KOTA SAMARAHAN: Universiti Malaysia Sarawak (Unimas) semampai jauh perening nyendiaka peluang ngagai komuniti bepanau kelebih agi nembiak ke belajar dia.

Nengah Fakulti Seni Gunaan enggau Kreatif (FSGK), peluang disedia ulih mantaika penau enggau pengelandik sida nengkebang ba semua sukut industri kreatif.

Sapit Mandal Canselor Pansik enggau Inovasyen Unimas Profesor Dr Wan Hashim Wan Ibrahim madah, pengawa tu mega ulih muka runding sida ti angkunka pengawa seni tu sereta meri pangka positif ngagai Perintah Sarawak enggau mega menua.

“Pengawa ngajar enggau belajar FSGK tu dikena ngambi ngenegapka pelajar seni, main asal enggau pesaka asal ngagai komuniti nengah teori enggau praktikal dikena nempa raban profesional, penengkebang enggau pengemeran seni nangkup peminta menua.

“Nya alai, aku andal FSGK tu ulih ngemudi bidang seni, budaya enggau pesaka asal di menua tu baka palan bukai,” ku iya rambau Pengawa Bejadika Tibak Peransang Nembiak Taun Kepenudi (Cipta) 2019.

PENGINGAT BEGULAI… Wan Hashim (empat kiba), Asrul (tengah), Ahmad (empat kanan) disempulang bala temuai dipebasa bukai sereta pemelanja keterubah Cipta, Petrolium Negara Berhad (Petronas) begambar ungkup kenang pengudah pengawa bejadika program.

Hari nerima penatai mensia mayuh FSGK 2019 ti diatur beserimbai enggau program Cipta bela ngaul pengawa mandangka pansik ti tuju deka meri peluang ngagai pemansik fakulti mandangka projek enggau asil pansik sida.

Ku Wan Hashim, batang tuju program tu diatur dikena nyendiaka peluang kaul kerejasama entara raban akademik, industri, ejensi perintah enggau komuniti.

Pia mega ku iya, pengawa mandangka pansik nya nyadi pelasar mantaika asil pansik ti bepengulih ungkup dagang besai ngagai raban bisi pemerat enggau komuniti menua nya.

Sama datai, Sapit Mandal Canselor Akademik enggau Entarabansa Profesor Dr Ahmad Hata Rasit, Chairman Cipta 2019 Asrul Asshadi Mohamad Morni, Direktor Program Cipta 2019 Zulhamizan Mohd Rasip sereta bala temuai dipebasa bukai.

NERANG… Siku ari nembiak Unimas ngaul diri ba program Cipta nerang pasal asil produk ti ditengkebang sida ngagai bala temuai dipebasa.

 

TAU JARI… Entara asil projek ti bisi dipandang datai ari pansik bala nembiak FSGK Unimas.