KUCHING: Perintah Sarawak udah mujur nyendiakan urung 47,988 lot rumah naka Januari taun tu nengah program Skim Numbuh Palan Baru (SPS) enggau Skim Nangkir Genturung Pendiau (SPK).

Sapit Kepala Menteri Datuk Amar Awang Tengah Ali Hasan madah ari penyampau tu 36,578 lot udah diagih ngagai peranak menua ti mimit penatai pemisi enggau jelan pemisi.

Iya mansutka pekara tu lebuh nyimpul mosyen ari Opis Menteri Pemansang Mengeri enggau Pengeraja Asal Kedua ba Aum Renggat Keempat Dun ke-18 ditu, kemari.

“Program tu kena mantu ngelempungka tinggang belanja sida ti mimit penantai pemisi ngulihka lot tanah endur berumah.

“Ba baruh Langgur Pemansang Malaysia Lumpar Ke-11 enggau Pansik Setengah Penggal Langgur Pemansang Malaysia Lumpar Ke-11, agih semua belanja ti udah dikemendarka kena bejalaika 37 SPK enggau tiga SPS mungkur ungkus RM333.4 juta,” ku iya.

Seraya nya, iya madahka skim ke bukai ti bedau dikemendarka deka dipinta baru ba Langgur Pemansang Malaysia Lumpar Ke-12 ila.

Ba aum tu mega iya madah Perintah Sarawak bisi udah ngemujurka sebengkah chara dalam bejalaika SPS enggau SPK.

“Baka ti udah disebut ba Aum Dun sebedau tu, perintah udah netapka premium bagi lot rumah ba semua SPS enggau SPK enda ngeluie RM2,500 se-lot enda nyengkaum SPS Demak Renggat tiga, empat enggau enam.

“Bayar premium tanah ti udah digaga ngeluie RM2,500 diputuska dibayar baru lalu timpuh peminta ngambi bayar baru tu ulih digaga nyentuk ngagai 31 Oktober tu ila,” ku iya nerang.

Udah nya, iya nandu madah bayar pulai tu ila ulih ngelantangka 7,174 iku peranak ngempu tanah lot beungkus RM43.4 juta.

Nitih ke padah Awang Tengah, nyentuk ngagai 31 March taun tu bisi 4,537 iku pengempu tanah udah dibayar pulai ti beungkus RM28.97 juta.
“Taja pia, bayar pulai tu enda ulih digaga ngagai lot ti bekaul enggau jual beli tauka spekulasyen.

“Bisi 22 bengkah skim ti bekaul dalam pengawa nyeruri insfrastruktur ti berat baka ngaga jalai alun ba genturung SPS enggau SPK ti sebedau tu semina ngena jalai batu diseruri ngagai jalai alun tar, lot rumah ti diagihka sebedau tu enda ditimbuk ngagai ditimbuk enggau sistem parit ti sebedau tu semina ngena parit tanah ditambah ngagai parit semin (konkrit),” ku iya.