KAPIT: Kaban Parlimen Hulu Rejang Datuk Wilson Ugak Kumbong udah dipebasa bejadika pengawa nutup Kem Peransang enggau Penyulut Nembiak UPSR di SK Lepong Gaat, Baleh.

Ugak meransang bala apai indai enda mudah mantul nganjung bala anak sida besekula laban pelajar nyadika kunchi ngulihka pengidup menyana dudi hari.

“Aku minta apai indai ke bisi anak besekula anang leju nyekulaka bala anak kita laban semina pelajar aja ulih ngasuh sida kebal napi pemar ba pemansang dunya kemaya hari.

“Apai indai mega patut begempung sereta besaup enggau bala pengajar ngemataka ulah bala anak lebuh di rumah, ari sukut disiplin enggau akademik,” ku Ugak ngelalau.

Ugak mega temegah ati meda pemanah timbal diterima ari apai indai ke bisi datai meri peransang ngagai bala anak sida sepanjai kem nya diatur.

BASA TEMUAI… Ugak nabi bala ke bisi ngambat penatai iya di Sk Lepong Gaat.

“Ari pemayuh tubuh apai indai ke datai ditu sehari ngayanka pengiruh sida ke pekara sekula bala anak. Aku nemu bala kita datai jauh ari rumah panjai ke datai kitu laban deka meda pemujur bala anak.

“Nya kebuah bala anak enda tau enda ingatka pengiruh enggau pengepuh apai indai kita. Balas jasa sida ngena penyulut enggau pemujur ba pelajar,” ku Ugak meransang.

Batang tuju Kem nya diatur dikena mantu bala nembiak Primari Enam nyikap diri napi peresa UPSR seraya meri peransang ngagai sida.

Tu mega nyengkaum ngajar bala nembiak chara nyaut tanya peresa kelebih agi subjek Bahasa Melayu, Metamatik, Bahasa Ingeris enggau Sains.

Berebak enggau nya, Ugak udah ngemendarka geran penyampau RM5,000 ngagai sekula SK Lepong Gaat dikena sekula bejalaika aktiviti ti udah dilanggur sepanjai taun tu.

Kem udah digulu bala nembiak ari enam buah sekula primari datai ari batang Baleh baka SK Temenggong Koh, SK Entuloh, SK Nanga Merirai, SK Nanga Sempili, SK Nanga Kain enggau SK Stapang, Gaat.

Sama datai nyempulang Ugak bala pemesai ari opis perintah, bala tuai rumah sereta peranak diau besemak.

ADAT LAMA… Pengawa miring dulu diatur dikena ngepunka pengawa bukai seraya minta berekat.