KUCHING: Hope Place Kuching nandu pengawa pengasih sida ngagai ruang bilik seranta ti begunaka bantu.

Sekali tu raban Hope Place diuluka Pemungkal Palan Kelvin Wan ngatur pejalai ngabas ruang bilik ke diau di tengah mengeri Kuching ditu ti bisi anak nyelai pendiau (OKU).

Lenord Ane, 45 taun, nyadi tuai bilik ti ngiga belanja ke sida sebilik, bini enggau lima anak iya lalu anak lelaki ke tuai benama Fredrick Lenord ti OKU sereta begunaka bantu.

Fredrick, anak tuai beumur 12 taun lalu diatu belajar ba Sekula Pelajar Khas ti rejista dalam program khas.

Taja dipeda mata kasar baka ke bepengerai, tang Fredrick mayuh penimpang ngujungka iya isu. Iya mega bisi penyelai ba runding ke alai runding iya agi baka nembiak mit.

SINU… Hellini madah ngagai Kelvin sida sebilik, iya enggau laki sereta anak lima iku diau besekut ba bilik suwa nya.

Fredrick kala bepenanggul ngebong tungkul atau tang udah beputung lebuh iya agi mit.

Seraya Lenord gawa nyadi jaga bepenatai pemisi RM1100 sebulan di sebuah sekula primari enda tetangkupka belanja sida sebilik ti diau besekut nyuwa sebuah bilik mit.

Hope Place meri bantu pemakai ngagai sida Lenord sebilik lalu iya beterima kasih laban palan nya gerah jari ngelempungka tating belanja sida laban gaji iya abis kena mayar suwa enggau bebelika kereban sekula bala anak.

Kelimpah ari nya, Lenord mega bisi nerima bantu ari Opis Pengintu Pengelantang Mensia Mayuh (JKM) penyampau RM400 sebulan ungkup empat iku anak iya ke besekula.

Entara bantu udah dianjung raban Hope Place baka berau, gula, garam, mi, ruti, Milo, susu tepung enggau kereban sekula ti udah disua ngagai bini Lenord, Hellini bennet.

Penerang silik tau betanya ngagai Hope Place ba lumur 082-505 987 maya jam opis gawa, Hari Satu ngagai Hari Lima berengkah ari pukul 8.30 pagi – 5.30 lemai seraya Hari Enam ari pukul 8.45 pagi – 12.00 tengahari.

Kandang diatu Hope Place mantu lebih ari 190 ruang bilik ti seranta lalu mensia mayuh diperansang besaup nyuaka pemeri barang pemakai enggau utai bukai kelimpah ari bantu mata duit.

Mensia mayuh ke bisi ati nyuaka pemeri tau dipasuk ke dalam Akaun Maybank 5112-8900-1160 ngena nama Persatuan Kebajikan Harapan Kuching.

GERAH JARI… Kelvin nyuaka bantu ngagai Hellini ngarika sida sebilik.