KUCHING: Siku indu peranak menua luar nyaru diri nyadi manang didawa di Kort Majistret ba ditu, laban pengawa nipu siku indu peranak menua tu mungkur duit enggau barang berega penyampau RM180,000.

Li Yufen, 34, peranak China ti enda diarika luyar tu enda ngaku penyalah pengudah penyalah iya dibacha ba mua Majistret Zubaidah Sharkawi.

Nya alai, Zubaidah netapka 11 Jun tu ila nyadi haribulan becharaka kes enggau enda nyendia sebarang jamin ngagai orang ke salah.

Iya mega ngerah orang ke dituduh ditan reman di Jil Puncak Borneo kelimpah pasport entarabansa iya diberi ngagai kort nyentuk kes tu tembu.

Berindik ari nya, Kepala Opis Pansik Penyalah Komersial Sarawak, Superintendan Mustafa Kamal Gani Abdullah madah, indu nya diasuh manang ke beumur 55 taun nyerahka semua duit enggau barang berega dikena pengawa muru antu ba rumah iya di MJC Batu Kawah.

Indu nya ngasaika kena tipu lalu ngaga ripot polis sebedau manang nya mujur ditan bala raban Unit Pansik Penyalah Komersial, Indu Opis Polis Pelilih (IPD) Miri di Miri, kena 21 April apin lama ke udah.

“Komuniti patut bejimat ngambi enda kena tipu laban irau nyangka bisi sida bukai bejalai dalam modus operandi ti sama,” ku iya rambau dirandau.

Ungkup kes tu, manang nya udah didawa siti penyalah nitihka Seksyen 420 Kanun Keseksaan di Sibu sereta siti agi kes nitihka seksyen ti sama di Miri.