“Mengeri pintar meseti ngembuan mayuh data, fokus datai sereta arus internet ngembuan peneras 5G.”

KUCHING: Perintah Sarawak bebendar dalam ngatur pemansang ungkup nengeri tu enggau chara moden dikena nyapai status nengeri maju manggai taun 2030.

Kepala Menteri Datuk Patinggi Abang madah mayuh bengkah inisiatif udah dilanggur, nyengkaum numbuh mengeri pintar.

Nya alai, ku iya perintah nengeri udah ngaga atur nempa kerejasama enggau Huawei, dikena ngerandang teknologi telekomunikasi serikat entarabangsa dalam ngemansangka mengeri pintar di Sarawak.

“Mengeri pintar meseti ngembuan mayuh data, fokus datai sereta arus internet ngembuan peneras 5G.

“Enggau tu, kitai mega ulih mutar pengawa salah, mutar isu kereban pengangkut mensia mayuh, daya idup enggau ke bukai.

UDAH SEDIA…Kepala Menteri Datuk Patinggi Abang Johari Tun Openg nyuaka tepa ngagai speaker Forum Ketuai Asia Ke-2 Malaysia di BCCK, kemari.

“Tu entara kunchi dikena kitai nyadi menua maju manggai taun 2030 lalu kami udah sedia,” ku iya.

Iya madah munyi nya rambau bejadika pengawa nutup Forum Ketuai Asia Ke-2 Malaysia ba Palan Aum Borneo Kuching (BCCK) ditu kemari.

Sama datai Menteri Kaunsil Kandang Menua enggau Pengawa Berumah datuk Dr Sim Kui Hian enggau Menteri Menteri Muda Undang-undang, Kaul Sarawak enggau Perintah Besai sereta Matau Projek Sharifah Hasidah Sayeed Aman Ghazali.

Abang Johari madah nama utai ke diguna Sarawak dikena ngamatka juluk tu iya nya nempa rebak baru ke ngembuan pengelandik dalam bidang teknologi pemadah (IT).

“Kami begunaka orang landik dalam bidang ngaga analisis data, pengelikun siber enggau berebak enggau nya ulih ngaga program sereta nengkebang utai,” ku iya.

Nya alai, ku iya nengeri tu udah nyendiaka peransang puku enggau nambahka belanja ke udah bisi.

Pia mega, ku iya ngemanahka infrastruktur dalam ngemansangka sitak menua pesisir.

Berebak enggau nya, Abang Johari madah nengah polisi Ekonomi Digital Sarawak ukai semina fokus ngagai kandang mengeri, tang dikerembai ngagai menua pesisir.

Nya alai, ku iya pengawa dipejalai nyendiaka bungkur telekomunikasi nyentuk ngagai menua ulu di nengeri tu.

“Kitai patut berundingka chara baru dalam ngangkatka penatai pemisi enggau pengaya orang ba menua pesisir kelimpah nyungkak tikas pengidup sida.

“Ekonomi menua pesisir ukai semina bekaul enggau pengawa betanam betupi, tang industri , ekonomi digital sereta servis ke ulih dikerembai.

“Taja pia, dikena nyapai juluk kitai udah nyendiaka perengka telekomunikasi nyentuk ngagai komuniti ke diau jauh. Tu pemar besai ngagao kitai,” ku iya.