KUCHING: Siku indu dituduh di Kort Seksyen, Bitulu sehari tu laban ngereja penyalah ‘Love Scam’ nipu duit siku indu beungkus RM22,350.

Kenu ku Kepala Opis Pansik Penyalah Komersial Sarawak, Superintenden Mustafa Kamal Gani Abdullah, penyalah nya dibacha Pemesai Pedawa Inspektor Siti Mariyah Dahari ba mua akim Wan Farrah Farriza Wan Ghazali.

Taja pia, kenu ku tetuduh, Bangie Seli, 46, ti nadai diarika luyar ngaku enda salah.

“Tetuduh dilepaska ngena jamin duit RM4,500 enggau dua iku pejamin peranak ti bekereja tetap,” ku iya ba siti penerang, sehari tu.

Mustafa madah indu nya bekelala enggau saspek nyaru diri nyadi siku lelaki kena Mei 2018 nengah Facebook.

Indu nya kena tipu ngujungka iya nepu duit penyampau RM22,350 ngagai akaun tetuduh dikena ngemansutka barang ke udah dubungkus dipadah udah ditanka Opis Kastam di Padang Bilun Entarabansa Kuala Lumpur (KLIA)

Mustafa madah indu nya nepuka duit ngagai akaun tetuduh kena 17 Julai 2019 penyampau RM4,500 enggau RM17,850 kena 18 Julai 2018.

Ku iya tetuduh nya ditangkap Unit Pansik Penyalah Komersial Indu Opis Polis Miri di bandar raya Miri kena 9 Mei apin lama ke udah.

Saspek dituduh nitihka Seksyen 424 Kanun Keseksaan lalu enti ditemu salah ulih dijil nyentuk lima taun.

Kort netapka Pre Trial Case Management (PTCM) kena 20 Jun tu ila.

OVE SCAM…Saspek didawa ketegal nipu duit siku indu penyampau RM22,350.