SIBU: Mayuh orang setuju enggau polisi baru perintah bekaul enggau tikas cheremin chelum ba penuduk penumpang enggau belakang dipadahka Menteri Perengka Pengangkut apin lama ke udah.

Evelyn Anja rambau dirandau pemberita setuju enggau polisi baru ngemendarka 70 peratus penampak terang (VLT) ungkup cheremin mua enggau 50 peratus VLT ungkup cheremin penuduk penumpang enggau sepiak penuduk deriba.

“Aku nyukung polisi baru cheremin chelum tu seagi ba mua iya nya ba penuduk deriba enggau penumpang luan ulih dipeda.

“Semua tu ungkup pengelikun,”ku iya.

Siku pengajar, Peni Nyanggai mega setuju enggau atur baru lalu bepenemu atur tu ungkup pengelikun enggau pengerai bala penguna.

“Aku setuju enggau pemutus VLT nadai atak ungkup cheremin belakang laban bangku nembiak ba bangku penumpang belakang.

“Berindik ari nya, cheremin chelum tu ulih nagang panchar mata panas pengangat terus ngagai anak kitai.

“Pekara tu mega ulih nagang penguna kena penyakit strok haba,” ku iya nerang.
Siku agi deriba, Agah Geramu mega setuju enggau pemutus tu.

Iya andal ati lebuh nemu bala deriba diatu ulih ngaga chermin belakang entukar sida chelum ba baruh atur ke baru tu.

“Kitai patut nerima ubah ari perintah lalu aku besetuju ketegal dipadah pasal pengelikun,” ku iya.

Ba penemu Anis Dana, VLT penuh ungkup cheremin belakang tu siti atur ke manah ari perintah seagi cheremin depan enggau cheremin tisi depan agi ulih dipeda.

Pengawa ngena cheremin chelum enggai nadai betatak tauka chelum penuh dikemendarka ba cheremin tisi kiba enggau kanan penumpang sereta cheremin belakang entukar diterit kena 8 Mei.

Atur sebedau tu netapka tikas penembus panchar urung 30 peratus.

Raban Penerit adat Opis Perengka Pengangkut Jalai (JPJ) deka bepun bejalaika pengawa meresa entukar ba baruh atur baru dalam timpuh tiga bulan.