KANOWIT: Perintah Gabungan Parti Sarawak (GPS) enda kala ngenusahka rayat, ku Kaban Parlimen Kanowit Datuk Aaron Ago Dagang.

Tang, GPS seruran ngeletak penanggul enggau peminta rayat nyadi batang pengawa ke dikereja.

“Mayuh pekara udah disediaka Kaunsil Pelilih Kanowit (MDK) ngagai bala pedaja ba ditu lebuh nyediaka palan alai sida bedaja.

“Pengawa tu ukai meri pemar tang meri penyenang ngagai sida bedagang perengka tamu enggau ke bukai.

“Suba, bala pedaja masang payung kediri, besekut, berebut palan lalu bedaja enggau gaya hari ke angat ba tisi jalai.

MUNGKAL GAWAI… Aaron (tiga kiba) mangkung tawak kelai bejadika Bazar Gawai Kanowit. Bela dipeda Alexander (empat kanan), Petrus (dua kanan), Maurice (kiba), Kathreen (dua kiba) sereta ke bukai.

“Tang diatu perintah nyediaka palan ke lantang, beperabung, likun lalu mayuh agi perengka ba ditu,” ku iya.

Iya madah baka nya rambau bejadika Pengawa Ngelancharka Bazaar Gawai Kanowit di Makit Mayuh Guna Kanowit, Jalai Banglo ba ditu, kemari (Hari Lima).

Bisi datai rambau pengawa tu Kaban Kaunsil Nengeri (Adun) Ngemah Alexander Vincent, dua Sekretari Politik Kepala Menteri Maurice Giri enggau Petrus Igat Matthias, Pemesai Pelilih Kanowit Kathreen Eddie Saga, Sekretari MDK Anthony Luta sereta temuai ti dikangau ke bukai.

Kenu ku iya, taba baru tu lebih besai sereta likun tajapan jauh mimit ari pasar Kanowit.

“Nadai perintah ba dunya tu deka meri pemar ngagai rayat, pemaik rayat nya batang pekara ti dikemeratka.

“Nya alai, jaga manah lalu intu pemeresi palan tu,” ku iya madah nyemetak.

Aaron madah, taba baru Makit Mayuh Guna Kanowit tu ulih nyadi siti palan matak mensia mayuh ngagai pelilih Kanowit.

Iya mega madah, palan tu ulih matak temuai menua luar ti rindu meli sereta meda asil dagang ke ngembuan pengelain.

“Ngarapka bala pedaja mujur sereta ngambika palan tu ulih nyungkak ekonomi penatai pemisi genap pedaja tamu ke mindah ngagai palan baru,”ku iya.

Berindik ari nya, Kathreen rambau meri jaku pengelalu madah Bazaar Gawai Kanowit tu diengkah sepiak Makit Guna Mensia Mayuh Kanowit alai bepuluh pedaja nyual mayuh bengkah bansa pemakai, ai irup enggau perengka ke diguna kelebih agi maya Pengerami Hari Gawai Dayak tu.

Iya mega ngelalau bala pedaja nyengkaum pedaja tamu ba diak ngambi nyaga pemeresi ngambika palan bedaja nya beresi kelimpah ulih narit mayuh agi temuai datai kia.