SARIKEI: Gawai Dayak enda lama agi deka diintu tang taun tu, Tanmung Umdau, berasai seilu-ilu ngenang nasib diri nyau bebelas taun enda nemu kini pendiau anak indu dikesayau ke iya.

Ukai taun sebedau tu enda ngintu Gawai tang umur diatu udah manggai 61 taun kelimpah enda bepengerai baka dulu suba ngasuh ati iya lelengau betunga mua enggau Sunah Renang ti lama ninggalka bilik sida di Rumah Medan, Sungai Baji, Sarikei.

Ngelama tu mega endang nadai nyelingkut hari nganti Sunah datai ngundang sekali ke ngirum berita tauka mantaika mua.

Indai tuai nyau enda bepengerai nya maya berandau enggau Suara Sarawak bisi terang agi mua laban andal nyangka berita tu udah diayan anak iya ti dipelaba berumur dalam 40 taun ulih enggau sida ngintu Gawai Dayak taun tu.

“Iya ninggal ke kami udah chukup lama. Kami sebilik enda nemu dini iya diatu.

PULAI MIH ANAK…: Tanmung minta anak iya Sunah (gambar mit) mulai ke diri ngagai sida sebilik.

“Bebelas taun nadai nganjung berita, enda nanyaka rita kendua apai iya, bala madi tauka kaban belayan.

“Aku enda nemu sekali ke iya gerai tang kami sebilik semampai besampi ke iya gerai sereta meruan idup.

“Andal amat aku iya mulai kediri begawai enggau kami taun tu,” ku iya bekunsi penyinu ati enggau pengarang, kemari.

Tanmung diatu enda tentu bepengerai agi kelimpah kala ditan di sepital sebedau tu.

Iya enggau laki iya, begulai enggau siku agi anak lelaki kelimpah iya ke indu, tuai ari Sunah udah bisi ruang bilik kediri.

Tanmung madah, sida sebilik andal amat minta saup mensia mayuh ngenataika pengelengau enggau pengandal sida ngagai Sunah pulai ke menua.

“Minta nuan anak pulai ngabas kitai sebilik.

“Kami enda nemu dini endur nuan diatu, gerai tauka enda nuan diatu,” pia ku iya madah.

Sunah enda ngira dini alai diau tau betelefon ngagai indai iya ba lumur 013-8380591

Mensia mayuh mega ti nemu pendiau Sunah dipinta besaup mantupka pengelengau ati Tanmung betemu enggau anak iya nyadi nyata.