Ulah meseti diubah anang mina nyadi mandur

“Ba taun 2030, Sarawak diperambu nyadi nengeri bepenatai pemisi pemadu tinggi sebengkah chara iya nya nengah sektor betanam betupi ngambika rayat ngereja tanah ke dipenggi diri empu.”

BETONG: Rayat dilalau begulai enggau Perintah Sarawak ngambi ulih nyapai visyen nyadi pemansut eksport besai pemakai nengah pemansang tanah lalu diberi gelar nengeri bepenatai pemisi tinggi manggai taun 2030.

Kaban Kaunsil Nengeri (Adun) Layar Gerald Rentap Jabu madah, rayat patut pintar enggau nemu ngena tanah diri empu ngambi ulih ngemansutka asil.

“Ba taun 2030, Sarawak diperambu nyadi nengeri bepenatai pemisi pemadu tinggi sebengkah chara iya nya nengah sektor betanam betupi ngambika rayat ngereja tanah ke dipenggi diri empu.

“Kitai endang ngemeratka aktiviti betanam betupi nyengkaum pengawa ngena chara ke baru dikena nambahka penatai pemisi.

JAKU LALAU… Gerald Rentap Jabu rambau bejaku maya Pengerami Makai Lemai Gawai Dayak Renggat Bagi Menua Betong diatur di Balai Raya Lumba Tan Sri Datuk Amar Stephen Kalong Ningkan, lemai kemari.

“Tu meh peluang kitai ba menua pesisir ti ngembuan mayuh tanah.

“ Tang ulah kitai mega patut berubah. Anang semina nyadi mandur tang patut sama ngereja pengawa,” ku iya.

Iya madah baka nya rambau bejaku maya Pengerami Makai Lemai Gawai Dayak Renggat Bagi Menua Betong diatur di Balai Lumba Tan Sri Datuk Amar Stephen Kalong Ningkan, lemai kemari.

Iya mega nerang, sektor betanam betupi ke diatu ngembuan peluang ke besai kelebih agi dalam industri pemakai.

Iya mega ngelalau rayat ngambi enda tepejuh enggau berita ba media rama pasal skim pengawa nyukat tanah ba baruh Seskyen Enam.
“Perintah ngaga pengawa nyukat penuh nengah Seksyen Enam ngambika tanah nya bisi geran.

“Jerita ti ditusui madahka chara perintah dikena ngerampas tanah nya enda betul. Perintah deka nyaga hak rayat ti bisi tanah,” ku iya.

Rentap ngingatka rayat ba menua tu ngambi ngemeratka pelajar bala anak kelimpah nyaga penyerakup enggau pengelantang raban bansa.

“Pelajar tu meh sebengkah chara pemadu besai laban ulih ngubah chuan pengidup nyadi lebih manah agi.

“Pia mega, penyerakup raban bansa patut dikemeran. Aku berani madah Betong tu meh chunto pengawa penyerakup bansa ke pemadu manah.

“Nyadi komuniti ari mayuh pupu raban bansa enggau pengarap, genap kitai patut ngembuan semengat bebasaka pengarap enggau main asal orang bukai.

“Nyema penyerakup enggau pengelantang ulih dikemeran, langgur sereta pengawa ngaga pemansang deka muntang sereta lanchar dipejalaika,” ku iya.