KUCHING: ‘Anang nguji malut pengerami Gawai Dayak enggau politik,” ku Tuai Rumah Sili Bunsi ari Sungai Buluh, Sadong Jaya.

Iya madah sida serumah bisi kebuah enda nerima penemuai Menteri Komunikasyen enggau Multimedia Gobind Singh Deo ngagai pengerami Hari Gawai ba rumah panjai sida.

“Pekara tu diputuska pengudah kami komiti rumah panjai enggau bala ke sama ba rumah panjai nya berandau pasal pekara tu.

“Pemuas ke berandau, dia kami ngaga pemutus enda nerima penemuai sida berami ba rumah panjai kami laban sida nadai mai pemesai tauka menteri kitai Sarawak sama ba pengerami nya,” ku iya.

Sili mansutka jaku nya rambau pengarang berita ba Indu Opis Parti Pesaka Bumiputera Bersatu (PBB) ditu, kemari.

Tuai Rumah Sili Bunsi (kanan)

Nangkanka nya, ku Sili, pekara nya bepun ari lima iku ti madahka deka ngaga pengerami Hari Gawai maya 31 Mei tu ila.

“Sida lima tu tadi madahka menteri ari menua Semenanjung deka datai berami ba pengerami nya lalu siku menteri tu tadi Menteri Komuniskasyen enggau Multimedia Malaysia, Gobind Singh Deo.

“Tang aku empai nyaut pinta nya laban deka berundingka pekara nya dulu,” ku iya.

Pengudah bejaku lalu berandau enggau sida ke sama ba rumah panjai nya, dia sida mutuska enda nerima penemuai nya.

Ku Sili, sida datai kitu nadai mai menteri tauka pemesai ari menua Sarawak lalu tu siti pekara ke enda patut.

“Sida tu baka deka bepolitik enggau pengerami Gawai Dayak.

“Enti ulih, anang main politik enggau sebarang pengerami adat bansa di menua tu lalu aku ngarapka orang Dayak sereta bansa bukai anang guai mendingka pekara ti enda amat,” ku iya.