KANOWIT: Perintah Gabungan Parti Sarawak (GPS) deka terus ngubah nasip rayat menua pesisir ba nengeri tu.

Pekara tu dijamin Kaban Kaunsil Nengeri (Adun) Machan Allan Siden Gramong rambau Program Begulai Enggau Rakyat Rumah Untol Lenggang di Nanga Menalun, Sungai Poi ba ditu, Hari Enam apin lama ke udah.

Ku iya, rayat anang nangi pasal penumbuh GPS pengudah keluar ari Barisan Nasional (BN) kena taun nyin kemari.

“GPS ngemeratka pengidup anak Sarawak bekereja ba nengeri tu kelimpah nyelinting pasal pemansang ngagai peranak menua pesisir.

“Kepala Menteri Datuk Patinggi Abang Johari Tun Openg mega deka nengeri tu dipegai rayat iya empu enggau parti iya dikena nentuka pejalai pemerintah nengeri tu,” ku iya madah nyemetak.

JAKU LALAU…Allan mansutka jaku rambau program begulai enggau rayat di di Rumah Utol di Nanga Menalun, Sungai Poi.

Bisi datai rambau program tu, ex Adun Machan Datuk Gramong Juna, Ketuai Gerempung Indu Parti Pesaka Bumiputera Bersatu (PBB) Machan Dato Catherine Gramong sereta bala ketuai raban bansa menua tu.

Iya madah deka terus nyelinting pasal pemansang ba sitak iya ngambika idup rayat ba sitak menua pesisir ulih dikemansang.

“Nengah GPS tu, nadai utai dikenangi kelimpah kitai patut arap laban semua parti ba nengeri tu mugkur dalam semua pekara. Pekara tu manah agi ari bisi parti luar ngaul pekara tu.
“Awakka perambu pemansang dudi ila enggau pekara ke bukai ba nengeri tu dtentuka rayat kitai empu,” ku iya madah.

Nangkanka nya, iya deka peranak menua pesisir seruran sabar nganti pemansang ke deka dipejalaika.

Perintah ngembuan perambu kediri empu dikena ngemajuka sitak peranak lalu pekara tu ukai muntang laban mungkur mayuh agih bantu, ku iya.

“Perintah GPS endang bisi perambu ungkup kitak ba genap sitak di DUN machan tu. Nya alai, aku deka ngabas enggau ninga penanggul kitak lalu berundingka pematut awak meri pemaik ungkup semua.

“Anang alah enggau orang bukai ke deka ngajum rayat benchi ka GPS,” ku iya nambah.

Berebak enggau nya, Catherine mega nyuaka duit penyampau RM1,000 ngagai biro indu Rumah Untol.