KUCHING: Lepas 69 peratus undi mati diberi bala kaban Instagram ngujungka siku nembiak indu ngaga pemutus terejun ari ringkat tiga begunan rumah kedai di MJC, Batu Kawa ba ditu, lemai kemari.

Sebedau penusah tu nyadi, indu beumur 16 taun ngaga siti undi ‘Really Important, Help Me Choose D/L’ ti meri reti D (mati) enggau L (idup) dalam status Instagram iya urung pukul 3 lemai, kemari.

Sepengudah diterangka bakih iya, 69 peratus kaban Instagram milih D lalu 31 peratus agi milih L.

Pia mega, indu nya bisi nulis status ba Facebook- aku deka mati laban lelak idup – Wanna Quit Life I’m Tired.

Kepala Polis Pelilih Padawan Superintendan Aidil Bolhassan ngamatka penusah nya ditemu menyadi lelaki indu nya lebuh bejalai pulai ngagai rumah suwa pengudah makai enggau indai iya urung pukul 8 lemai.

Lebuh bejalai ba tisi begunan nya, iya tepeda ka menyadi iya tetingkap atas jalai penuh enggau darah.

Taja pia, Aidil madah indu nya munuh diri ketegal asa enggau apai tiri ke gawa ba Singapura jarang pulai ke Kuching pengudah jadi enggau indu peranak Vietnam

“Kami nerima ripot bekaul penusah tu pukul 8 lemai ari siku lelaki ke datai ngagai balai ke semak madahka bisi siku nembiak enda dikelala terejun ari begunan sereta tetingkap penuh enggau darah atas jalai,” ku iya.

Kenu ku Aidil, indu nya mati ba palan penusah nya nyadi ketegal balat bakal ba pala enggau bangkai iya deka dibai ngagai Sepital Besai Sarawak ungkup pansik.

Ku iya, nadai penyalah ditemu ba palan nya lalu kes diklasifikasyen nyadi mati ngenyit.