KUCHING: Perais mata duit RM5,000 besereta sash nganti champion Kumang Gawai Cats (KGC) 2019 deka dipadah ba Aeon Mall, lemai 18 Mei 2019.

Pemenang lumur dua enggau lumur tiga sama bela deka mai pulai duit RM3000 enggau RM2000.

Nangkanka nya, champion gelar ‘Miss Darlie Smiles’ mega mai pulai duit penyampau RM2000 ti deka dipadah rambau program nutup pekit nya ti diatur ba Aeon Mall tu ila.

Pengatur Pengawa Nyual & Pengawa Makit CATS FM, Alvin Justin Miduk madah, Darlie ti nyadi penaja gelar Miss Darlie Smiles udah bekerejasama enggau piak CATS FM pengelama tiga taun bejurut dikena ngemujurka program CKG tu.

Bala Penaja CKG2019, Aeon Mall Kuching Sentral mega bisi nyereta nyadi palan ngatur aktiviti finalis pemadu mayuh.

SAPA LEBIH BAJIK?… Bala FINALIS CATS KUMANG GAWAI 2019.

Kenu ku Alvin, 10 finalis diatu benung napi pemar ba edisyen ketiga CKG lalu udah disedia mayuh bengkah aktiviti ke patut dipejalaika.

“Kelimpah nyereta sesi dandanan, catwalk tauka bejaku ba mua mayuh, finalis mega meseti nembuka sekeda pemar ke nguji pengelandik bejaku enggau besosial.

“Entara iya ngelawa tadika enggau meri licha, bebeli perengka Gawai Raya enggau bala nembiak mit, berandau enggau mensia mayuh ba media rama enggau radio, sereta betandak tandak ngajat,” ku iya.

Nambahka nya, bala finalis deka mai 20 iku nembiak mit ke dipilih ngagai Kampung Samariang Batu enggau Kampung Siol Kandis meli gari enggau kasut baru ba Aeon Mall beserimbai enggau pengerami Gawai enggau Raya ti deka datai.

“Milih gari nitihka peminta nembiak mit ukai pekara ke muntang tang nembiak mit ke beumur entara 5 nyentuk 12 taun berasai gagit sereta andal ati bulih gari baru dikena pengerami Gawai Raya tu ila ,” ku iya.

Entara 10 penyereta CKG 2019 renggat kepenudi iya nya Perisilla Chudie (19), Kashwaria Panjanathen (19) Grandy Mina Mihim (24), Jasmine Allan (20), Chelsea Amanda Simon (20), Lidya Yusreena Abdul Ellias (24), Genevie Marsha Tan (19), Maria Magdelene Mada Seng’ Ngen (22), Thasya Elvy Aboi (22) enggau Wesna Jetis (20).

GAUK KE NEMBIAK… Sepengudah lelak bebeli ka barang, bala penyereta CKG 2019 enggau nembiak mit begambar ungkup kenang.