KUCHING: Peranak Sarawak ulih ngerami mayuh bengkah adat enggau asal sida.

Menteri Dagang Temuai, Seni, Main Asal, Nembiak enggau Lumba Datuk Abdul Karim Hamzah madah, Sarawak temegah nyadi pengatur Rainforest Fringe Festival (RFF).

Nitih ke iya, tu renggat ketiga Sarawak dipilih endur ngatur RFF kena 5 ngagai 12 Julai 2019.

“RFF nyadi pemungkal Rainforest World Music Festival (RWMF) enggau Joe Sidek Production Sdn Bhd ti dichiri nyadi pengatur.

“Ba taun tu, mayuh program ditambah nyengkaum mandangka asal enggau adat komuniti ditu,” ku iya lebuh ngaga pengarang berita ba Auditorium Kort Lama Kuching ditu kemari.

Ku Abdul Karim, program baka ASAS MELAYU deka mantaika orang nunjukka fesyen Lembar Emas-Songket enggau Keringkam Sarawak dipantai Raja Fesyen Sarawak, Datuk Seri Benard Chandran, Datuk Tom Abang Saufi enggau Tanoti House of Kuching.

Kelimpah nya, ku iya program ba ujung minggu iya nya panggau Primates deka mantaika Ghaffar Pourazar ari Beijing Opera, koreografer Thailand Jitti Chompee, penari enggau koreografer Pulau Pinang Liu Yong Sean, Penari Sabah Lim Pei Ern enggau penari menua tu empu.

Pengawa bejadika RFF deka diatur kena 5 Julai bepalan ba Begunan Dun Lama, Petra Jaya.

RFF RENGGAT KETIGA….Ari kiba Datuk Lee Kim Shin, Datuk Abdul Karim Hamzah, Sharzede Salleh Shukor enggau Joe Sidek bergambar begulai mandangka poster RFF 2019.