TANJUNG MANIS: Sepenyampau 831 iku penerima bantu Aidilfitri ari Pusaka enggau Anak Serikat Pusaka ditu tadi.

Bala penerima datai ari orang tuai, Raban Nyelai Pendiau (OKU), indai tunggal, anak patu balu enggau mualaf sereta raban seranta.

Pengatur Pengawa Besai Pusaka Hashim Bojet madah, tu program dipejalai di baruh tanggungpengawa rama korporat (CSR) Pusaka kenyau ari 19 taun ke udah.

Batang tuju program tu dikena mantu raban seranta enggau sida ti begunaka bantu seraya ngelempungka tating belanja sida.

“Sida ti nerima bantu tu datai ari peranak ke diau di Kampung Belawai, Jerijeh enggau Rajang.

“Aku ngarapka sida ulih ngena manah bantu tu ungkup belanja ruang bilik sida lebuh bulan Ramadan enggau ngintu Hari Raya Aidilfitri enda lama agi,” ku iya.

Pengawa nyuaka bantu dipejadi Menteri Muda Perambu Mengeri, Pengatur Tanah enggau Rampa Menua Datu Len Talif Salleh ke mega Kaban Kaunsil Nengeri (Adun) Kuala Rajang.

Sama datai Kaban Parlimen Tanjung Manis Yusuf Abd Wahab, Pengatur Pengawa Besai Pusaka Hashim Bojet enggau Pemesai Pelilih Tanjung Manis, Udin Bujang.

Kelimpah ari meri bantu Hari Raya Aidilfitri, Pusaka mega bisi meri bantu ngagai peranak Rumah Panjai Kampung Sebayang, Tusok, Stalun enggau Semalau ti deka ngerami Gawai Dayak.

Seraya 365 iku peranak deka nerima bantu di Palan Servis N41 Kuala Rajang di Tanjung Manis kena 18 Mei tu.