KUCHING: Pengawa mantaika penyampau reta ketuai perintah Sarawak nyengkaum bala Kaban Parlimen Gabungan Parti Sarawak (GPS) udah dianjung ngagai Opis Kepala Menteri.

Kenu ku Ketuai Whip GPS Datuk Seri Fadillah Yusof, semua nya deka dianjung serentak ngagai Opis Nagang Makai Suap Malaysia (SPRM) nyangkuam Opis Governas Integriti enggau Anti Makai Suap Nasional (GIACC) ila.

“Diatu, perintah Sarawak agi nganti atur ditetapka GIACC enggau SPRM,” ku iya nengah sebengkah penerang, kemari.

Dulu ari nya, iya madah perintah Sarawak nerima manah perambu GIACC munyi ke udah dipansutka Menteri Besai Tun Mahathir Mohamad ti minta semua menteri, sapit menteri enggau kaban pengereja pengawa ba opis menteri nyengkaum semua Kaban Parlimen penyakal mantaika penyampau reta ngagai SPRM.

Ku iya nya seriris enggau inisiatif perintah Sarawak ke nyadi keterubah udah nyain Danji Enda Makai Suap (IBR) enggau SPRM kenyau Januari 2017.

“Sarawak udah nyingkang ngagai nya lalu udah diaku SPRM pengudah semua kaban kabinet Sarawak ti nyadi kabinet keterubah nyain IBR enggau SPRM kena Januari 2017.

“Tambah mega Kepala Menteri Sarawak, Datuk Patinggi Abang Johari Tun Openg kebdanr udah ngasuh semua bala Kaban Parlimen GPS ngambika bela mantaika penyampau reta,” ku iya.

Mansutka buah penemu diri, Fadillah ke mega Kaban Parlimen Petra Jaya madah sigi naka ulih ngemeratka isu ngelaban penyalah makai suap.

Tambah mega maya dipadu ngiring Opis Menteri Kereja Raya (KKR) ba taun 2013 suba, pengawa keterubah digaga iya endang nyain Sempekat Pemereti Ati (MoU) Nuju Pengawa Munaska Makai Suap enggau SPRM.

MoU entara KKR enggau SPRM disain kena 1 Julai 2013 nya ngujungka KKR nyadi opis menteri keterubah di Malaysia nyain sempekat ‘Integrity Pact’ enggau SPRM.

“Tu mandangka kitai GPS endang ngemeratka isu makai suap enggau salah guna kuasa sereta nyukung sebarang pengawa dikena munaska penyalah makai suap nyentuk ke renggat baruh,” ku iya.