BEJALAI mindah ari menua siti nuju menua ke bukai, bedarat, ngerenchah kampung bebulan pengelama, mindah ngagai menua bukai ngiga pengawa dikena ngulihka reta tengkira, pegi belelang endang pengawa sida ke baru ngangkatka diri bujang, ngiga pengidup dulu menya.

Kenu ku Insol Harry, 47 taun madahka reti lelang nya pegi ngampar lama ninggalka menua diri enggau nadai meruan tuju.

“Mega tau dikumbai kitai pegi tauka bejalai pansut ari menua diri begigaka utai ti dijuluk ati; mindah ngagai menua orang laban bisi utai berat dipeguna deka digiga.

“Sida ke tuai menya balat ngasika ajar lalu pengawa pegi belalang tu sebagi ari gaya idup sida ke lelaki ngiga pengidup lalu pemulai sida deka dipebasa, disagu baka ngambat pemulai bujang berani ari nurun ngayau,” ku Insol lebuh dirandau Suara Sarawak.

Nali Adat

NYIKAP DIRI… Insol ngayanka gaya pekayan bala bujang ke deka nurun pegi belelang kelia.

Adat bejalai bansa Iban meransang orang bujang ninggalka rumah panjai sida lalu bejalai ke dunya luar ari menua sida begigaka reta tengkira, pengaya, pengeraja sereta engga prestij ari sukut pekara rama.

Menya, bejalai tu nyengkaum pengawa ngayau, pindah ke menua baru ketegal deka berimbaka temuda endur bumai lalu datai ba taun 1900, pengawa tu lebih ngagai begigaka asil kampung laban deka ditukar enggau tajau china.

“Maya bejalai di menua orang, enti dulu kelia tau mega dikumbai nurun belelang laban lama amat deka mulaika diri empu.

“Bisi deka terus belelang enda tepulaika diri ngagai menua asal, bebini tauka belaki ba menua orang.

“Pekara baka tu nyadi nyangka laban dulu kelia ukai baka ke diatu. Kereban pengangkut agi kurang lalu ditambah mega enggau jalai enda datai di kaki tangga baka diatu,” ku peranak asal Batu Lintang, Undop di Sri Aman.

NGASIKA AJAR… Semengat anak Iban meruan dikuan di dada.

Nadai ICT

Kelimpah ari nya ku Insol, jeman kelia nadai bekenaka telefon iya nya nadai perengka rama ke besangkaut paut enggau teknologi, pemadah enggau arus penyambung (ICT) ke ulih dikena begigaka pangan diri sereta ulih datai ba sebengkah-sebengkah menua ke dituju enggau lengkas sereta jampat.

Lebuh bala Iban nurun bejalai tauka belelang, jaku ajar enggau jaku tangkan ke suah diberi sida ke tuai nyadika ‘bekal’ maya ba menua orang, begulai enggau orang bukai iya nya rambai jaku ti munyi tu; Bejalai betungkatka adat, tinduk bepanggalka pengingat.

“Reti rambai jaku tu iya nya chara kitai tau ngemai diri maya di menua orang, begulai enggau orang ngambika enda bulih penusah tauka charut enggau orang bukai.

“Leka jaku nya mega dikena nyadika malin ngambika kitai semampai ngingatka diri empu awakka senang ngidupka diri begulai enggau orang bukai.

“Adat sereta basa nya beguna kelebih agi lebuh kitai begulai enggau orang ke bepangkat, tang lebuh maya begulai enggau bala kaban enggau ‘nembiak redak’ adat sereta basa mega beguna bendar,” ku iya ngingatka ajar sida ke tuai.

MALIN… Insol (bediri) nibarka jaku lalau ngagai bala mayuh sebedau nurun nemuai ngusung bala menyadi di Bengkayan, Kalimantan Barat taun tu tadi.

Sempama ke malin

Nya meh kebuah orang tuai jeman kelia menya nengkebang leka jaku tauka sempama, nyadika chuan sereta teladan, kelebih agi dituju ngagai sida ke rebak baru, ku Insol nampung.

“Taja pia, bisi mega maya utai belebas, lebih agi jeman moden kemaya hari diatu.

“Pekara tu nyadi, kelebih agi senentang adat tauka chara pengidup raban bansa Iban ke diau di rumah panjai dulu menya.

“Mayuh pengawa di rumah panjai tauka menua nya enda tentu engkeman enti majak dikemeranka tauka dikena lebuh diau di mengeri.

“Mayuh mega begunaka Iban empu meratika ulah orang bukai, nitihka singkang orang bukai ba mayuh bengkah pengawa,” ku iya.

KELAI BANSA… Rumah Adat di Bengkayan, Kalimantan Barat ti deka dipenyadi dalam bulan Julai taun tu, ngangkat enggau ngemai nama bansa pegari di mata dunya.

Basa enggau adat

Nangkan nya ku Insol, sebengkah agi adat sereta basa ke suah disebut orang tuai di rumah panjai baka semampai ngemaruhka diri, enti begulai enggau orang.

“Anang rigang-rigang, anang ngeringka diri, anang jelas-jelas enggau mayuh jaku tangkan ke bukai.

“Nya jaku ke suah didinga aku lalu lebuh diperatika baru, mayuh nya amat sereta endang tau nyadika lalau sereta tenggau lebuh begulai enggau orang bukai,” ku iya madah nyemetak.

Tang enti diperunding enggau lenak, enda semua pekara nya tau kelalu nyadika lalau, laban enti baka leka jaku ‘semampai ngemaruhka diri’, tau bendar nagang raban bansa Iban ari ti ngemansangka diri.

Belebas ngereja pengawa

Kemaya hari tu, bansa Iban patut sama besemekih enggau orang bansa bukai lalu sida enda tentu ulih kelalu ngemaruhka diri, bisi orang nyebut jelan iya, nya baru enda tinggal ari orang, tandu Insol.

“Sepekara agi nya anang kelalu kena palit leka jaku awakka orang dulu tauka ngelakka orang dulu.

“Genteran jaku tu tau ngujungka raban bansa kitai terus tinggal, enda tegagaika orang ke sigi udah lama dulu bekejang ari mayuh sukut bidang pengawa.

“Nya kebuah aku ngarapka enda ensiban ati ba pekara dibai aku kenang kitai.

“Enti asai iya penemu ditu enda tentu engkeman, ambi aja pekara tu semina leka jaku maya berandau kediri, berandau nengali.

“Kelimpah ari nya tau mega nyadika pun randau dikena kitai sama ngemansangka bansa Dayak kelebih agi bansa Iban awakka ulih besemekih enggau bansa bukai, enda tinggal ngasaika pemansang, nyulut ba pelajar ngambi ulih ngemansangka diri empu enggau bansa kitai jemah.

KELAI BANSA… Rumah Adat di Bengkayan, Kalimantan Barat ti deka dipenyadi dalam bulan Julai taun tu, ngangkat enggau ngemai nama bansa pegari di mata dunya.