Ngelansa penatai Iban Merotai di Tawau

Pengawa bejalai tauka belelang ke menua bukai endang udah lama dikemeran raban Iban kenyau ari kelia.

Berindik ari pengawa nya, Iban ke diatu udah bejalai nyentuk ngagai Eropah, Amerika Utara, Timur Tengah, Australia, New Zealand, Rusia enggau mayuh menua ke bukai.

Mayuh enda nemu orang Iban ari Sarawak udah bejalai ke Tawau, Sabah ba pun abad ke dulu suba. Sida ngentap di Merotai, Tawau nyentuk ke diatu Iban di Sabah dikangau Iban Merotai. Mayuh sida dipadah datai ari Song enggau Kapit.

NGETAN ADAT…Raban Iban di Sabah mengkang ngetanka adat nguna ngepan asal baka di Sarawak.-Gambar Facebook Iban Sabah

Bejalai tu main asal ke pemadu beguna ba komuniti Iban dikena ngubah nasit sida. Sida dipebasa lebuh pulai ke menua mai pulai reta baka tajau kelebih agi di rumah panjai,

Iban Merotai

Iban Sabah dikelala nyadi Iban Merotai beserimbai enggau pengentap tumu orang Iban ti mindah ngagai Sabah kena pun taun 1900.

Kelimpah di Tawau, Iban Sabah mega bisi ngentapka pendiau diri ba Labuan, Sipitang, Keningau, Lahad Datu, Kinabatangan, Sandakan, Ranau, Kota Belud enggau Kota Kinabalu.

“Kebuah sida bejalai ke Sabah iya nya ketegal sukut ekonomi, peluang gawa sereta deka ngubah kualiti idup,” kenu ku Profesor Dr Spencer Empading Sanggin dalam dalam licha betopik “Diaspora Iban di Sabah: Isu Migrasi dan Identiti” di Universiti Malaysia Sarawak apin lama ke udah.

TAU ALAI NEMUAI…Papan pal pengelalu ba mua rumah panjai Kampung Iban di Merotai, Sabah.

Bejalai ngiga pengidup

“Tuju bejalai tu dikena ngiga pengidup enggau pengakun rama. Sida ti pulai bejalai deka dipebasa bala komuniti,” ku iya ti megai Kursi Dayak.

“Idea ba pengawa bejalai tu dikena neresa dunya, ngiga jereki enggau nasit sereta pulai mai pengaya dalam pengidup enggau tikas rama,” ku iya seraya madahka pengawa bejalai orang Iban ngagai Sabah dikena nyungkak pengidup diri.

Ku iya, penatai sida di Sabah diaku perintah ari dulu suba. Nambahka nya, iya madah, sida ulih nelebaka diri diau ba palan ke baru.

Iban Sabah mega ninga radio ari Sarawak ngambika ninga program jerita, ensera enggau pengingat tuai.

BUJANG BERANI…Niang Jubang Anak Sandin, asal ari Rantau Asam Ulu Tekalit, Katibas, Song, Kapit. Entara Iban ke kala ngentapka pendiau diri ba Kampung Iban Baru, Merotai Besar Tawau, Sabah. Tu siku ari kaban Iban Tracker ti kala nerima midul King George VI. Iya midang kena 31 Mei 2018.

Sebedau taun 1963, Iban ke bejalai ngagai Sabah dulu ngagai Sandakan udah nya ngagai Lahad Datu lalu kepenudi ngagai Tawau.

Ba Tawau orang Iban diau ba Kampung Iban Merotai Besar, Kampung Iban Merotai Kecil, Kampung Pekan Merotai, Kampung Iban Kuala Nansang, Apas Balung, enggau Kampung Iban Muslim Kampung Selamat, Kunak, Tawau.

Tiga kategori Iban Sabah

Spencer nerang bisi tiga kategori Iban iya nya Iban Mit, Iban Besai enggau Iban Baru kebendar bisi kaul enggau pemesai tanah ke alai sida diau.

Iban Merotai kala mungkur dalam aktiviti betanam betupi, industri balak, gawa ba kebun tembakau enggau kelapa sawit sereta mungkur dalam aktiviti betanam betupi ke bukai.

Iban Sabah

Orang Iban keterubah bepindah tauka bejalai ngagai Tawau, Sabah dikelala nyadi Andawi enggau enam nama ke bukai.

Bisi entara sida mantu ngelara penyarut Mat Salleh kena taun 1896-1900. Udahnya sida ngaga pemutus terus ngentap ba Borneo Utara.

Dikena ngenang jasa sida, perintah meri pinchin besereta lima ekar tanah tiap siku ba sitak Tanjung Batu.

Ba ditu bepun serak pupu raban bansa Iban Merotai sepengudah sida jadi enggau indu peranak Tawau.

Dipelaba kediatu bisi urung 4,000 iku peranak Iban di pelilih Merotai.

Mayuh sida ngembuan darah penakan enggau bansa Dusun, Murut enggau Tidong.

Taja pia, sida agi ngemeranka identiti Iban lebuh ngena main asal nyengkaum ngena jaku asal Iban.

“Sida mujur ngemeranka identiti nyadi orang Iban. Kebendar, sida endang rindu sereta chakah ngemeran main asal pupu raban bansa Iban,” ku iya, kelebih agi sida diau ba sitak ke sebaka.

“Tu ngemuntangka sida lebuh betemu,” ku iya.

Ari sukut pengarap, 90 peratus ari bansa Iban Merotai bepengarap Kristian lalau ke bukai bepengarap Islam.

Kenu ku Profesor Spencer, sida agi ngemeranka pemakai asal baka nyumai pansuh, ngaga enggau ngirup ai tuak sereta ngereja adat ngulit enggau ngajat.

“Tang mayuh nembiak rebak baru bansa Iban enda landik dalam jaku Iban. Sida ditemu landik bejaku dalam jaku Tidong,” ku iya.