KOTA SAMARAHAN: Opis Pemansang Perintah Besai Nengeri Sarawak (SDO) nanggam kaul manah enggau Perintah Besai sereta Perintah Nengeri ba pengawa matau pejalai projek ditu.

Direktor Pemansang Nengeri Zaki Mahyuddin madah, projek dipejalai di Sarawak dipatau rat piak SDO.

“Ba Langgur Pemansang Malaysia Ke-11 (RMK11) Perintah Besai udah ngagihka RM4.3 bilion dikena bejalaika 602 projek selampur Sarawak.

“Status projek tu agi ba mayuh bengkah renggat, bisi ke udah tembu lalu bisi sekeda benung digaga,” ku iya.

Iya mansutka jaku nya lebuh dirandau ba Program Kasih Ramadan, di Kampung Baru tadi.

Iya mega madah, kerejasama entara SDO enggau Perintah Besai agi ditampung taja perintah udah bekalih.

“Kekerejasama meruan manah enggau Perintah Besai taja perintah bekalih.

“Kebuah pia laban Menteri Besai Tun Dr Mahathir Muhammad minta Sarawak dibantu ari sukut pemansang ti ngaul kerejasama Perintah Nengeri,” ku iya nerang.

Zaki madah, perintah Sarawak besaup bejalaika sebengkah projek ke udah dibatak pulai.

“Perintah Besai matak sekeda projek pengudah perintah bekalih.

“Nya kebuah Perintah Nengeri deka mantu bejalaika projek baka tiga jematan iya nya Igan, Batang Lupar enggau Rambungan seraya Perintah Nengeri sedia bejalaika projek enggau enda ngandalka bantu ari Perintah Besai,” ku iya madah ngagai Suara Sarawak.

Sida mega deka beratika semua projek dipejalai nitihka atur ke udah ditetap.