BINTULU: Sepenyampau 39 kontijen datai ari mayuh bengkah gempung ukai dikuasa perintah (NGO) Dayak nyengkaum bala menyadi ari Kalimantan Barat begempuru ngeramai Mantar Gawai Dayak 2019 Renggat Nasional ditu, pagi tadi.

Nitih ku penerang, pengawa bejalai bebala mayuh ti dikumbai Ngerandang Jalai Gawai pagi tu belabuh enggau pengawa miring urung pukul 6.30 pagi.

Tembu miring, bala kontijen deka belabuh bejalai urung pukul 8 pagi lagi nitihka ripih nama ti udah ditetap piak pengatur pengerami.

Tuai pengabang Mantar Gawai Dayak 2019 Renggat Nasional keterubah diatur di menua tu Menteri Komunikasyen enggau Multimedia Malaysia Gobind Singh Deo nguluka bala bukai Ngerandang Jalai Gawai lalu bejadika pengerami nya tadi.

TUAI PENGABANG… Gobind Singh Deo disempulang Ali Biju (kiba), Dusit Jaul (dua kib), John Brian (tiga kiba) sereta bala bukai lebuh nguluka pengawa bejalai Ngerandang Jalai Gawai 2019 di Padang Bilun Lama Bintulu. – Gambar RTM Sarawak.

Bala ketuai bansa Dayak bukai nyengkaum Kaban Parlimen Saratok Ali Biju, Pemesai Pangku Pengawa Khas Opis Menteri Komunikasyen enggau Multimedia (KKMM) Sarawak Dusit Jaul, bala pemesai menua, ketuai raban bansa sereta bala ketuai NGO Dayak bukai mega bisi nyempulang tuai pengabang.

Gobind mega disadang ngulu Program Ketuai Begulai Enggau Rayat – Program Sepakat Komuniti ti diatur opis menteri iya pengudah pengawa Ngerandang Jalai Gawai tembu.

Muakka malam lagi deka diatur Pengerami Makai Lemai Mantar Gawai 2019 di Dinner World Restaurant, Bintulu ti diatur raban Balang Balai Nyabung.

Chairman Pengatur, John Brian Anthony meri terima kasih ngagai semua penguang NGO ke datai sama nirika Gawai Dayak di Bintulu lalu sukung bala ke enggau Ngerandang Jalai Gawai chukup ngemegahka ati.

Lebih 400 iku datai nedat Padang Bilun Lama Bintulu ti bejalai penyauh 1.7km bela ngerasukka pekayan asal kelimpah diperindang ngena macham main asal bansa Dayak atas panggau besai nyengkaum kereban muzik asal Iban iya nya Belikan ti diidupka baru raban Akademi Dayak Iban Sarawak (Asadia).

GAP… Sida ke lelaki ngerasukka gagung ngena lelanjang lebuh Ngerandang Jalai Gawai pagi tadi. – Gambar RTM Sarawak.

Pengerami richah agi enggau penatai sereta sukung bala menyadi bansa Dayak ari Kapuas Hulu enggau Pontianak ari Kalimantan Barat kelimpah etnik Orang Ulu ke bukai.

Batang tuju pengerami tu mega ukai semina ngintu hari besai bansa Dayak aja tang mega ulih ngintu enggau ngangkatka adat asal, gaya idup enggau seni bansa Dayak.

Kenu ku Ketuai Pemadah, Johnny Chuat, pengerami tu ulih nerenakka semengat talukka kaul bebakih enggau beserekaup ngagai rayat Malaysia ti datai ari pupu bansa sereta pengarap.

“Program tu ukai semina ngaul raban bansa Dayak aja tang mega bansa bukai ke bisi di Malaysia kelebih agi di Sarawak ti datai ari pupu bansa enggau pengarap tang ulih besaup gawa ngemujurka atur pengerami nyadi siti tim,” ku iya ditibak ari Bernama.

Iya ngarapka nengah program tu adat lama, gaya idup enggau seni bansa Dayak ulih dikelala, diterima enggau diaku bansa bukai di menua tu sereta diangkat nyadi pesaka asal menua.

SUKUNG… Bala menyadi bansa Dayak ari Kalimantan Barat mega datai nirika pengawa Ngerandang Jalai Gawai tadi – Gambar RTM Sarawak.

 

Gawai lebuh nuntung ba panggau besai disempulang John Brian (kiba) enggau bala bukai Gambar RTM Sarawak.