ENGKILILI: Agih belanja RM20,000 dikena nyeruri perengka sekula enggau ngaga aktiviti pelajar nembiak SK Engkilili No 2 udah diagihka Kaban Parlimen Lubok Antu, Jugah Muyang.

Iya madahka pekara tu lebuh menyadika Pengerami Hi-Tea beserimbai enggau Hari Pengajar renggat sekula begulai enggau bala pengajar SK Engkilili No 2 kena 17 Mei tu tadi.

Ba pengerami nya, Jugah madah ngagai apai indai ngambika meri perati lebih ngagai pelajar anak sida laban semina enggau pelajar aja ulih ngubah pendiau pengidup anak-anak sereta apai indai.

Iya nambahka, semina enggau pelajar tikas penyeranta ba menua pesisir ulih diputar.

“Hari Pengajar ti diintu kena 16 Mei nyadi hari ti pemadu manah ngagai bala pengajar laban maya tu kitai mantai ke tanda basa sida ti udah ngajar nembiak ba selampur menua.

“Enda ngira dini alai sida gawa semua pengajar deka dikingatka laban sida tu ti ngembing anak bansa nyadi orang ti meruan jemah ila,” ku iya.

Kelimpah nya, iya madah pengajar ti ngajar enggau lurus ati ba menua pesisir patut dipuji laban napi pemar ngambika ulih meri pelajar ngagai nembiak menua pesisir sebaka ba mengeri.

“Ari sukut agih penatai pemisi kitai udah majak luas, anak ti mayuh penatai pemisi lebih mujur dalam pelajar laban sida ulih sekula ba palan ti mbar sereta tuisyen ba luar sekula.

“Lalu, anak ti penatai pemisi mimit semina begantung ngagai sekula perintah, nya alai sistem pelajar nyulut deka diberi ngagai semua sekula enda ngira sida ti seranta, menua pesisir tauka mengeri,” ku iya.

Sama bisi datai ngulu pengerami nya Mandal Direktor Pelajar Lubok Antu, Jim Andrew Janggi enggau Pemesai Bomba, Gemong Batu.

KELAI PENGERAMI…Kaban Parlimen Lubok Antu, Jugah Muyang (empat kiba) nyirap kek kelai bejadika Pengerami Hi-Tea beserimbai enggau Hari Pengajar renggat sekula.