BETONG: Kerejasama entara Opis Menteri Betanam Betupi Moden Tanah Asal enggau Pemansang Kandang Menua (Manred) enggau Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit (KWKPK) dipeda ulih berati nyadi siti strategi mantu bala penerima bantu pengintu pengelantang ngambika sida ulih nyungkak penatai pemisi diri.

Pekara tu dibantaika Sapit Kepala Menteri Datuk Amar Douglas Uggah Embas seraya madah Manred ngembuan program dikena nambahka penatai pemisi komuniti nengah aktiviti betanam betupi moden baka hidroponik enggau fertigasyen.

“Aku ngasaika tu siti chara ke patut sama dilanggur entara Manred enggau KWKPK ngambika bala penerima bantu ulih ngasilka penatai pemisi kediri empu kelimpah ukai semina bepanggai ngagai bantu ninting bulan ke disediaka perintah.

“Sida ulih mungkur dalam pengawa betanam betupi moden nengah chara hidroponik baka ngena teknologi ke biasa enggau enda begunaka mayuh pengereja,” ku iya.

Iya ti nyadi Adun Bukit Saban bejaku baka nya rambau bejadika Pengawa Sejambak Kasih Gawai Dayak enggau Hari Raya Aidilfitri sereta Pengawa Nyuaka Wang Turu Pemeri (EFS) ti diatur di Balai Sukan Tan Sri Datuk Amar Stephen Kalong Ningkan, Hari Minggu.

PENGELANTANG RAYAT… Uggah nyuaka bantu ngagai siku ari bala penerima rambau Pengawa Sejambak Kasih Gawai Dayak enggau Hari Raya Aidilfitri sereta Pengawa Nyuaka EFS ba Betong, Hari Minggu. Bisi dipeda maya pengawa nya, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato’ Sri Fatimah Abdullah. Gambar OSMAN

Kenu ku Uggah, opis Menteri iya deka mantu ngelaku ke produk ti diasilka.

“Aku nemu nyema sida diberi pelajar ke betul, raban tu ulih nyungkak penatai pemisi kediri.

“Nengah chara tu, sida ulih nyingkang ke mua ari kategori penerima bantu pengelantang kelimpah ngembuan gaya pengidup ke lebih manah.

“Berindik ari nya, kededua opis Menteri patut berundingka strategi ke ulih dipejalaika,” ku iya.

Senentang bantu ninting bulan Opis Pengintu Pengelantang Komuniti (JKM) Sarawak, Uggah madah ari Januari nyentuk April taun tu penyampau RM67.3 juta diberi ngagai 56,096 iku penerima selampur Sarawak.

“Pengawa meri bantu duit ninting bulan ngagai raban ke kurang penatai pemisi tu dikena mantu sida lebuh bisi penanggul seraya ngurangka penyeranta.

“Ninting taun, pemayuh penerima bantu tu majak nambah, ari 57,047 iku (2017) nambah ngagai 57,588 iku (2018) enggau nyentuk April 2019, bisi 56,096 iku,” ku iya nerang.

Ba pekara ke bukai, iya mega madah bisi 46,376 iku penerima bantu Sejambak Kasih Gawai Dayak enggau Hari Raya Aidilfitri ba selampur Sarawak.

Bisi datai rambau pengawa tu Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato’ Sri Fatimah Abdullah, Kaban Parlimen Betong Robert Lawson Chuat enggau Adun Saribas Mohammad Razi Sitam.