KUCHING: Penemu Pengelicha Kanan Politik enggau Entarabansa, Fakulti Sains Sosial dan Kemanusiaan Unimas, Dr Lucy Sebli Seidelson madahka sebarang pemutus tauka pengawa bekaul enggau adat bansa asal di Sarawak patut bemalinka Kaunsil Adat Istiadat Sarawak (Mais).

Kenu ku oya, sekalika perintah ke megai menua diatu, piak penyakal enggau orang tauka raban ngatika diri ti bisi penguntung politik nguji malut Gawai ngena politik endang pengawa ti enda patut nyadi.

“Laban SDNU mega sebuah gempung ukai dikuasa perintah (NGO) Dayak, ba penemu aku, sida mega patut dulu agi minta sanding penemu pasal pekara tu ngagai Mais.

“Ba pekara tu, aku pechaya pangku pengawa nyeridi rayat pasal reti enggau tuju ngintu Gawai Dayak patut dilempai ngagai Mais, lalu ukai SDNU,” ku iya lebuh dirandau Suara Sarawak, kemari.

Iya mansutka jaku tu lebuh dipinta ngelansa pasal langgur penemu Gerempung Bansa Dayak (SDNU) numbuhka sebengkah gempung khas dipadu gawa ngatur pengawa ngintu Gawai renggat nengeri tauka perintah besai.

Dr Lucy Sebli Seidelson

Ku Dr Lucy, Gawai Dayak diintu raban bansa Dayak di Sarawak dikena berami pengudah tembu ngetau padi.

“Dulu suba, Gawai dirami nitihka pengarap bansa Dayak dikena meri terima kasih ngagai Petara ninting pengawa bumai tembu sereta sebedau ngepun pengawa bumai ba taun baru.

“Gawai Dayak minta komuniti iya bebasaka gaya idup enggau nentuka semangat padi seruran bisi sereta dipebasa lalu mayuh bansa Gawai diintu kitai bansa asal nitihka tuju enggau batang pengawa ke deka dikereja,” ku iya nerang.

Nya kebuah iya nyemetak madah, ba pekara nya pangku pengawa Mais endang diguna amat.

Dulu ari nya, Presiden SDNU Tan Sri William Mawan Ikom ba penerang berita madahka sida merambu numbuhka sebengkah gempung khas ngambiak ripih, adat enggau tradisi gawai ti engkeman ulih dibantai lalu ngangkatka status Gawai.

Ku iya, nadai kuasa enggau ripih pengawa ke berurun, sekeda raban ulih salah guna enggau beambi ulih ari Gawai Dayak.

Iya mansutka jaku nya ngelansa pasal pengawa ngintu Gawai Dayak Renggat Nasional di Bintulu kena Hari Enam nyin tadi ti digulu ke lalu nyadi Tuai Pengabang Menteri Komunikasyen enggau Multimedia Gobind Singh Deo ti diatur sekeda raban nadai ngaul kerejasama ari gempung ngarika raban bansa Iban, Bidayuh enggau Orang Ulu.