KUCHING: Kenyau 1 Januari nyentuk 16 Mei tu tadi bisi 587 iti kes dirikod enda nitih atur ti ditetapka Opis Menteri Dagang Dalam Menua enggau Pekara Bebeli Barang (KPDNHEP) ba selampur menua Sarawak.

Tu nyengkaum pengawa meresa ba 33,576 premis iya nya 29,904 premis ba mengeri lalu 3,672 premis ba menua pesisir.

KPDNHEP udah ngerampas penyampau RM6,405,054.63 barang lalu udah ngenaka kompaun penyampau RM81,350 ngagai orang dagang.

Pekara tu dipansutka Direktor KPDNHEP Datuk Stanley Tan lebuh meresa atur timbang ba Program Stamping Point Perengka Timbang Sukat ba Medan Niaga Satok ditu, kemari.

Ku iya, beserimbai enggau Hari Gawai Dayak ti deka datai, KPDNHEP udah netapka 14 bengkah rega barang dijaga sereta meseti dilekatka tanda rega chura mirah jambu (pink) ba Bagi Menua Kuching, Lundu, Bau, Serian, Simunjan, Samarahan enggau Asajaya berengkah ari 25 Mei nyentuk ngagai 7 Jun tu ila.

PERATI KELAI TU…Direktor KPDNHEP Datuk Stanley Tan (tiga kiba) nunjuk ngagai media stiker ti patut diperati lebuh bebeli ke barang.

Barang ti dijaga rega tu baka manuk idup, manuk standard mata udah dibunuh, manuk super mata udah dibunuh, manuk tuai idup, sayap manuk, telu manuk gred A, telu manuk gred B, telu manuk gred C, kubis segala import, bawang putih China, chabi rangkai, dagin jani idup, dagin jani (perut) enggau dagin jani (dagin enggau lemak).

“Pengawa pagi tu digulu Opis Dagang Betanam Betupi Perintah Besai (FAMA) enggau Metrology Corporation Malaysia (MCM) kena meresa perengka timbang ba Medan Niaga Satok tu nitih ke atur ti udah ditetapka.

“Pia mega kami meri awak ngagai sida ti bedagang ditu nganjung timbang sida ngelekatka stiker (penentusahan) nitihka atur timbang enggau sukat ti betul bagi timpuh setahun,” ku iya.

Stanley nambah nyema bisi orang bedagang enda nitih ke atur timbang enggau betul sida deka di ukum enda ngeluie tiga taun jil enggau ukum mata duit enda ngelui RM40,000 tauka kedua nya sekali.

“Nyadi ngagai sida orang bedagang enggau penguna ba luar patut merati ke timbang ti dikena meseti bisi stiker enggau betul laban ba stiker nya bisi kelaie timpuh haribulan, berapa pemerat timbang enggau lumur siri.

“Pelilih Satok tu palan keterubah diperesa lalu kami deka meresa palan bukai ba genturung Kuching laban deka nagang orang bedagang nipu penguna ti bebeli ke barang kelebih agi pengerami Gawai Dayak ti deka datai,” ku iya.

Nangkan ke nya, Stanley nesau mensia mayuh ti bebeli ke barang lebuh pengerami Gawai Dayak ila ngambika bejimat sereta meratika timbang ti dikena sida bejual enggau betul lalu nitih ke undang-undang kena nyeliah diri ditipu.