SPAOH: Lebih setaun PH megai perintah di Putrajaya, rayat Sarawak dipinta begempung nentuka Bumi Kenyalang enda lepau ke jari sida.

“Kitai enggaika pisang bebuah dua kali,” ku MP Betong Datuk Robert Lawson Chuat.

Kenu ku iya, pekara ke nyadi kandang setaun tu pengudah PH megai Putrajaya, mayuh perkara ti enda ngemantupka ati.

“Terang aku madah, mayuh orang enda entu lantang ke perintah PH laban mayuh projek pemansang Sarawak disekat.

“Bisi ke udah dikemendar sebedau tu, dikinsil. Pengawa ngaga jematan diambi Perintah Sarawak ti nampung pengawa nya laban keranka pemansang.

“Nya kebuah aku ngarapka rayat menua tu ulih berati enggau manah, anang sesekali kitai di Sarawak meri peluang dipegai parti ti ukai ari Sarawak,” ku iya.

Iya mansutka jaku tu lebuh ngulu Program Randau Begulai Enggau Bala Ketuai Renggat Baruh Dun Bukit Saban ti diatur di Rumah Francis Nyanggau Penom, kemari.

Ku iya, enti sema sida (PH) ulih nguasa Sarawak, pekara ditegi enggau ditan kitai ngelama tu mega deka lenyau.

“Nya kebuah rayat Sarawak patut berundingka pekara tu.

“Sapa deka lenyau hak? Lenyau pesaka? Lenyau kuasa imigresyen?

“Kelebih agi pemar ditapi diatu ke alai sida dedin mayuh chara melit kitai dataika kitai tu dipeda salah, sida aja betul. Tang aku andal, rayat udah nemu mida.

“Aku ngansak bala ketuai renggat baruh bejalaika pangku pengawa diri empu, nerang ngagai semua semina GPS nengah rambai jaku ‘Sarawak First’ aja ti deka nyaga enggau nentuka menua tu seruran maju,” ku iya madah nyemetak.

Berebak enggau nya, Robert mega udah nyuaka geran MRP Perintah Sarawak penyampau RM285,000 ngagai 95 JKKK enggau Biro Indu.

SIRUKA RAYAT… Robert nyuaka chek MRP ngagai siku ari penerima geran beserimbai enggau program sehari nya.