LUBOK ANTU: Gerempung Veteran Soldadu (PVTM) Lubok Antu/Engkilili dipinta semampai ransing nyadi gerempung ti ngemeratka pengelantang enggau pengelikun raban sida.

Kaban Parlimen Lubok Antu Jugah Muyang madah, gerempung nya megai tanggungpengawa besai nyaga raban sida bepelasarka jaku beserakup.

“Gerempung tu nyadi menalan kitai mantaika langgur penemu sereta penanggul ke ditapi bala kaban.

“Nyengkaum tanggungpengawa bekaul enggau pengawa nerang pasal bantu ti disediaka perintah ngagai bala raban,” ku iya.

Iya mantaika jaku tu rambau Aum Besai Ninting Taun (AGM) gerempung nya ke diatur di Balai Mensia Mayuh Engkilili empai lama.

KENANG KITAI… Jugah (dua kanan) enggau Rayong (dua kiba) begambar nyadika kenang enggau raban PVTM Lubok Antu/Engkilili.

Sama datai ngemataka aum tu iya nya Adun Engkilili Dr Johnical Rayong Ngipa.

Ku Jugah, kaul ke manah ngemai reti besai nentuka kerejasama rat entara sida pulaika pemanah gerempung enggau pengari rayat menua nya.

PVTM Lubok Antu/Engkilili udah ngayanka diri bebasaka pengawa perintah ti nyendiaka bantu enggau saup ngagai gerempung sida, ku Jugah.

Taja nadai entu nyengala sapa bagi ke mantu tang pekara pengelikun enggau pengelantang sida seruran diintu enggau diperunding nitihka pematut, ku iya nambah.

“Ari pengelebih dikembuan tu, kitai agi ngansak sida ke bukai naka ulih ngetanka penyerakup begulai enggau pangan diri.

“Genap iku kitai bela megai tanggungpengawa besai mantaika langgur penemu sereta penanggul ditapi,” tandu iya.

Berebak enggau aum nya, Jugah bisi nyuaka geran RM10,000 ngagai PVTM Lubok Antu/Engkilili dikena bejalaika program gerempung sida.

Iya madahka penyampau geran ke diberi nya endang mit enti dibanding enggau jasa raban gerempung ke berambunka nyawa ngetan pengelikun menua.

“Tu mih dikena ngayanka sukung ngagai kita taja penyampau tu enda mayuh.

“Ngarika semua rayat sereta perintah Pakatan Harapan (PH), aku meri jaku besai terima kasih ngagai semua raban enggau kaban veteran soldadu,” simpul iya.