KUCHING: Mensia mayuh patut bekerejasama ngemunas sebarang ulah salah guna kuasa enggau ulah enda menuku ti nyadi ngagai komuniti kitai.

Menteri Kereja Raya Baru Bian madahka baa komuniti patut berani datai ke mua ngaga ripot ngagai piak bekuasa kelebih agi raban polis.

“Kitai enda ulih nejuka ulah ti salah majak nyadi lalu sida ke ngereja pengalah lepas pia aja ari atur undang-undang,” ku iya ba sebengkah penerang, kemari.

Penerang tu nimbal pasal pengawa ngetan siku pengajar ti dituduh ngayahka tiga iku nembiak iya di Pelilih Lawas.

Nya kebuah Baru ke mega Adun Ba’Kelalan minta polis mansik kes nya enggau silik ngambika atur patut ulih dipejalai.

“Sinu meda enti siku pengajar ti dikeandal nyeridi enggau ngajar bala anak sanggup ngereja ulah enda menuku baka tu.

“Enti sema dituku amat ngereja penyalah tu, iya patut dibai ngagai kort ngambika diakim sereta nerima ukum ti patut,” ku Baru nandu.