BETONG: Beserimbai enggau Gawai Dayak enggau Hari Raya taun tu Kolej Komuniti Betong ngatur Kus Nganta Pemun ngagai 20 iku indu ari sitak Betong, Saratok enggau Sarikei.

Kus tu diatur Kolej Komuniti Betong nengah kerejasama GiatMara Sri Aman di Balai Kolej Komuniti Betong apin lama ke udah.

Pengajar ke bisi dikangau ngembing kus iya nya Nur Ruhiya Amira Shahip, Pengelicha Kus Nganta enggau Nyaga Pemajik Mua ari Giat Mara Sri Aman.

Kus diatur sehari nyentuk berengkah pukul 8 pagi nyentuk 5 lemai ti dibagi ngagai dua renggat, muakka pagi belajar nganta siang hari seraya muakka lemai belajar nganta malam hari.

Genap penyereta ti mujur nembuka kus udah diberi setipikit ti disua Direktor Kolej Komuniti Betong, Shairul Al-Suzana Shahidan.

CHARA TI BETUL… Bala penyereta benung belajar ngena kereban nganta ke betul.

Nitih ku penerang ari Pemesai Pelajar Sepanjai Idup KKBS Nurul Hidayah Yussof, kus baka tu ukai semina diatur di palan nya aja tang mungkur balai mensia mayuh, balai sekula, masjid enggau surau.

“Batang tuju Kus tu dikena mantu enggau ngiri penemu sereta pengelandik ngagai bala penyereta belajar chara ngantaka mua diri empu enggau mua orang bukai ngena chara enggau kerebak ke betul.

“Kelimpah nya, kus tu mega ulih meri penemu ngagai sida ti bisi ati ngaul diri ba pengawa dagang nganta.

“Kami mega bisi merambu deka nampung pejalai kus bukai baka kus nyanggul buk, kus berapi enggau ke bukai,” ku iya nerang.

Tanya enggau penerang silik pasal kus timpuh pandak tu tau ngelawa Facebook Kolej Komuniti Betong tauka telefon nuju Nurul Hidayuh ba lumur 083-471830.

NYAPAI TUJU… Pengudah tembu kus bala penyereta diberi setipikit seraya begambar bebala mayuh.