BETONG: Peranak rumah panjai patut seruran bejimat dikena nyeliah sebarang penusah angus maya musim hari besai Gawai Dayak seraya nyikap diri ngena perengka pengerara api ba rumah sida empu.

Kebuah pia ku Sapit Kepala Menteri Datuk Amar Douglas Uggah Embas laban maya hari besai deka mayuh pengawa dikereja di dapur enggau bekenaka kereban elekterik ti tau ngasuh penusah angus nyadi.

“Aku semina ulih nibarka jaku lalau ngagai peranak rumah panjai ngambi seruran bejimat laban penusah nadai bebah datai sereta tau bepun ari pengilap diri.

“Nya kebuah beguna amat genap rumah panjai ngembuan perengka pengerara api ke penabat maya penusah datai,” ku iya.

Iya mansutka jaku nya lebuh nyuaka perengka pengerara api ngagai bala tuai rumah di sitak Bukit Saban di Rumah Francis Nyangau, Penom semak ditu, kemari.

Berebak enggau nya, Uggah ke mega Adun Bukit Saban bisi ngagihka sepenyampau 155 unit perengka pengerara api ngagai 95 tuai rumah ngarika rumah panjai sida.

Sama datai MP Betong Datuk Robert Lawson Chuat, Sekretari politik Kepala Menteri Dr Richard Rapu enggau Pemesai Kanan Opis Bomba enggau Penyah Penusah Betong Henry Jugah.

Ba lansa sama, Henry madahka sida udah ngatur kus ngagai peranak rumah panjai pasal pengawa nagang penusah angus enggau ngerara api.

Ku iya, ari penemu baka nya sida ulih nagang enggau nyeliahka diri ari ngereja pengawa ti tau ngasuh penusah angus nyadi kelebih agi di rumah panjai ti majak dituntung penusah karam di darat di menua tu.

KE PENABAT… Uggah nyuaka kereban ngerara api ngagai siku ari tuai rumah dipegai sitak Bukit Saban.