SARATOK: Rayat patut muka runding sereta nerima langgur penemu perintah ngemayuhka bansa utai tanam sida kelebih agi nanas ti enda bemusim.

Ku Kaban Parlimen Saratok Ali Biju, nanas bansa MD2 manah ditanam di pelilih menua tu sereta bisi pengulih besai enggau peminta tinggi ba makit pemakai.

“Nanas bansa tu tan lama dataika dua minggu, ari timpuh buah dikarang lalu lubah luluh enti disimpan meruan.

“Buah mega pelai, chukup manis sereta ngundan isi pemakai ti manahka pengerai kelimpah ulih diinjin, digaga nyadi produk bukai,” ku Ali nampung.

Ali mansutka jaku tu lebuh Mantar Gawai beserimbai enggau Pengerami Makai Taun Ke-10 Rumah Panjai Kuchun, Jabey Baruh apin lama ke udah.

TIBAK PENEMU… Ali bejaku ba mua mayuh meransang peranak Saratok chakah ngaul diri ba projek nanam nanas.

Ku Ali, tu berindik ari rega komoditi baka sawit, getah enggau lada majak nurun. Mayuh mega randau enggau runding bala pengari rayat enggau bala menteri renggat perintah besai mutarka penanggul ditapi rayat.

“Naka ulih mega kami ba Parlimen nguji mutarka penanggul tu tang bangat enggai nyadi ketegal pangka ekonomi dunya.

“Kebuah pia laban menua bukai ke sama mansutka asil sawit, getah enggau lada nyual produk sida mudah agi ari enggi kitai ti ngasuh kitai nadai pilih bukai tang nitihka rega sida.

“Enti enda baka nya, asil komoditi kitai enda laku sereta nadai dibeli lalu pengerugi deka besai agi sereta ekonomi menua mega enda ulih maju,” ku Ali madah nyemetak.

Beambika chunto pemujur projek nanam nanas Wong Besi di Kabo ke alai Chendang Chebun, 48 taun, nerima bantu ari Opis Menteri Bumai enggau Industri Betanam Betupi (IADA) enggau Kaunsil Industri Nanas Malaysia (LPNM).

BASA… Ali dipebasa muka kuta Mantar Gawai Rumah Kuchun, Jabey Baruh apin lama ke udah.

Chendang diatu mujur ngerembaika makit nanas iya lalu nanam Nanas MD2 bisi 15,000 pun enggau Nanas Moris lebih ari 90,000 pun sereta Nanas N36 enggau Nanas Sawit tauka Nanas Pada dalam 3,000 pun.

Nya alai ku Ali, anang enggai ngerebut peluang ti udah disediaka perintah dikena ngemansangka diri ba pengawa betanam betupi sereta nyungkak ekonomi sida.

“Kitai di Saratok ditu benasit amat laban Perintah Besai mendingka peneka enggau nangkup peminta pemansang menua tu nyengkaum ngagihka belanja pemadu besai ari semua sitak parlimen ke bisi di Sarawak.

“Taun tu perintah besai udah ngagihka RM13 juta lalu taun baru, 2020 kitai di Saratok deka nerima agih belanja penyampau RM16 juta lalu tu ngayanka perintah endang keran ngemai pemansang kitu, ngemansangka rayat,” tandu Ali.

Sama datai Residen Betong Friday Belik, bala ketuai raban bansa, pemesai ari ejensi perintah, peranak rumah panjai besemak sereta bala bukai.

KEMERAH… Ali nabi sida ke bisi ngambat penatai iya di Rumah Kuchun, Jabey Baruh.

 

ADAT LAMA… Ali disempulang bala bukai miring dulu ba tengah laman sebedau bejadika Mantar Gawai enggau Makai Taun Ke-10 Rumah Kuchun, Jabey Baruh.

 

SAMA SINGKANG… Ali dibai niki ke rumah kelai basa rayat ngelalu penatai iya ngagai rumah panjai sida.

 

BIAU PENGABANG… Piring enggau sida ke miring bela kena pansa leka biau enggau sampi ngajihka pengawa sida sebuat diberekat petara.