KUCHING: Nembiak ke tinggal sekula entara pugu penanggul kes nembiak agi biak umur betubuh bisi majak nambah.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Sri Fatimah Abdullah madah penanggul tu ukai semina nyadi ngagai bala nembiak besekula aja tang ditemu nyadi ngagai sida ke tinggal sekula.

“Nitihka statistik ari Opis Pengerai, urung dua peratus nembiak indu ke ditemu betubuh bisi nadai besekula.

“Diatu kami benung mansik nama kebuah sida tu tau nadai besekula, nyangka ketegal bisi penanggul ba ruang bilik, kena pasung enggau belaki tumu,” ku iya nerang.

Fatimah mansutka jaku tu rambau aum pengarang berita di Wisma Bapa Malaysia ditu, kemari.

KENANG… Fatimah begambar enggau raban OSTPC, pengari Opis Residen, sereta pengari ari Opis Pengerai Bagi Menua Kuching, Samarahan, Bintulu, Miri enggau Kapit.

Nangkan nya ku iya, peratus kes tumu betubuh bisi nambah nyangka bisi kebuah bukai mega.

“Taun 2018, urung 416 nembiak indu agi biak dirikod belaki tumu.

“Tu nyengkaum 105 iku belaki ngena chara syariah, 56 ngena chara sivil lalu 255 ngena chara adat,” ku iya nerang silik.

Ba taun ke sama ku iya, urung 91 nembiak indu beumur entara 12 ngagai 16 taun udah ditemu kena pasung seraya 51 ari sida tu ditemu betubuh bisi.

Kelimpah ari nya, 53 peratus ari 1,140 kes dalam taun 2018, nembiak indu beumur entara 18 ngagai 19 taun dirikod udah belaki.

“Tu nunjukka sida tu belaki tumu pengudah tembu belajar pom 5.

“Seraya 194 nembiak indu beumur entara 12 ngagai 19 taun udah belaki lalu ditemu dua kali betubuh bisi.”

Nya alai ku Fatimah, pengawa numbuhka One Stop Teenage Pregnancy Committee (OSTPC) dikena nyaup mutarka bala nembiak indu ke betubuh bisi tumu ari sukut pelajar, pengerai, ngintu pegelantang, rejister surat pengada sereta ke bukai.

OSTPC enggau Komiti Pemansang Rama Sarawak nguji ngiga jalai ngatur program dikena ngurangka peratus nembiak betubuh bisi tumu, ku iya madah nyemetak.