SARATOK: Inisiatif ngangkat enggau ngemansangka Rumah Dayak Saratok patut disukung ku Kaban Parlimen Saratok, Ali Biju.

Ku penemu Ali, Rumah Dayak tu nyadika kelai peneguh kaul serakup enggau nunjukka kitai di Saratok ulih begulai bebaik ngatur pengerami besai kitai bansa.

“Aku sedar sereta meretika peminta raban SDNU Saratok senentang Rumah Dayak kitai ditu enda chukup endur bala mayuh begelumu maya ngatur pengerami dia.

“Taja udah ditangkir besai agi mega enda tetangkupka pemayuh tubuh bala pengabang ke datai berami lalu aku lantang ati meda pemanah sukung kitai menua tu, bededat nyukung pengerami,” ku Ali nerang.

Iya mansutka jaku tu lebuh bejaku bejadika mantar Gawai Dayak SDNU Pampang Saratok 2019 diatur di SJK (C) Min Syn, Saratok apin lama ke udah.

ARAM ENGGAU AKU… Ali minta semua besaup enggau bekerejasama ngemansangka Rumah Dayak Saratok.

Nya alai ku Ali, iya ngemai rayat bela berunding enggau mansutka penemu baka ni chara enggau jalai pemadu manah nentuka Rumah Dayak ulih endur ngatur pengerami.

“Peminta tu mega ngayanka kitai ditu rindu begulai enggau pangan diri ngintu pengerami nadai ngira bida penemu politik, pengarap enggau bansa.

“Rumah Dayak tu mega kelai kitai Dayak di Saratok ditu. Nya kebuah aku keran amat ngemai bala kelebih agi komiti SDNU, SIDS enggau gerempung bukai berundingka chara ngangkatka Rumah Dayak tu nyadi pelasar mantai budaya, adat ti ditampung ari aki ini.

“Aku minta semua kitai besaup enggau bekerejasama ngelangkar enggau ngemujurka tuju enggau juluk tu nyadi nyata, Rumah Dayak ti nipakka gaya idup kitai bansa asal ditu,” ku Ali madah nyemetak.

Nipakka pengeran iya, Ali ngagihka belanja keterubah penyampau RM100,000 dikena nyeleti Rumah Dayak Saratok lalu enti bedau chukup jemah deka ditambah baru dataika semua kitai tepantup ati enggau Rumah Dayak tu.

BESILIH PENEMU… Ali (tengah) disempulang Friday (muak kanan) enggau Alexander (muak kiba) sereta bala bukai bekunsika penemu pasal pemansang bansa Dayak.

Seraya geran penyampau RM30,000 diberi ngagai SDNU Saratok dikena sida bejalaika atur pengawa tauka sebarang program ngambika lanchar pulaika pemaik semua, ku Ali nerang.

“Pemujur atur pengawa tu beguna amat ngambika rayat ulih meda jasa SDNU Saratok sereta pengawa ke manah deka dikenang dataika jemah,” tandu Ali.

Sama datai Tuai Gawai Alexander Sela ke mega Chairman SDNU Saratok, Residen Betong Friday Belik, bala ketuai raban bansa, bala pengari NGO Dayak sereta bala bukai.

Pengerami Gawai Dayak diatur kena ngerapitka tanggam kaul enggau ngemansangka adat sereta gaya idup raban bansa Dayak ngagai tikas dunya.

Nya alai raban SDNU Saratok ransing ati ngatur pengerami tu sereta meri terima kasih ngagai bala pengabang ke datai meri sukung enggau besaup ngemujurka atur pengerami.