KUCHING: Menteri Muda Pemansang Industri Malcolm Mussen Lamoh muji pemujur pengerami Mantar Gawai Kelab Rekreasi Batang Ai (Barec).

Iya madah pengawa mantar nya diatur endang datai ari runding raban Barec empu.

“Tu pengawa ke chukup badas laban siti ari peluang endur semua orang ke datai ari Batang Ai / Lubok Antu ke gawa di Kuching begulai sejalai enggau pangan diri kelebih agi ba musin Gawai,” ku iya rambau bejadika pengerami nya ba Samarahan Country Club kena 18 Mei tu tadi.

Ba pengerami nya, Mussen ke mega Adun Batang Ai bisi ngungkupka agih belanja RM5000 ti disuaka bini iya Dorothy Slyvester Pungga ngagai Gerempung Anak Seni Iban Malaysia (Pasima).

Bela bisi bejaku Chairman Barec Brown Sang ke mega nyadi tuai Gawai meri terima kasih ngagai Mussen laban udah limpang ngenataika diri nyadi tuai pengabang sereta NGO ke udah meri sukung baka Gerempung Main Golf Dayak (DGA) enggau Asadia.

ADAT BASA…Penatai Mussen benung dikelaluka bala komiti pengatur pengerami.

“Ngena peluang tu aku madahka pengaga ati diri laban pengawa mantar gawai tu udah mujur diatur. Pengerami Gawai ke bansa tu deka diintu ba taun ke dudi. Taja pan pia, iya nyangka manah agi diatur dua taun sekali.

“Enggau tu aku meransang raban kelab bela angkunka aktiviti kelab laban Barec tu siti kelab ti chukup badas endur kitai begulai sejalai sereta bekunsika penemu enggau peneleba enggau pangan diri”, ku Brown nyimpul jaku.

Entara aktiviti ke bisi diatur miring, nebah gendang pampat, enchabut tikit benasit enggau nyuaka sitipikit sereta enggau perais ngagai pemenang pekit diatur DGA. Nambahka nya bala mayuh mega bela beperindang enggau KBC Band, raban koir Barec enggau aktiviti beperindang ke bukai.

Sama bisi datai bala tuai rumah, penghulu, kaunselor, pemancha ari pelilih Batang Ai, Lubok Antu sereta bala bukai

 

KOMITI PENGERAMI….Brown begambar kenang enggau bala komiti seraya nganti penatai pengabang.